Rinovimi i kontratës së Lamine Yamal deri në vitin 2031 është zgjatja më e fundit e kontratës për Barcelonën me një prej xhevahireve të saj. Siç ka bërë me dije “Mundo Deportivo”, lojtari i ri ka ruajtur klauzolën e lirimit prej 1 miliard eurosh për të parandaluar që klube të tjera të jenë në gjendje ta marrin yllin e ri të Barçës në të ardhmen e afërt.
Te Barcelona e kishin të qartë se një nga prioritetet e tyre ishte të siguronin vazhdimësinë e Yamal në planin afatgjatë dhe për këtë arsye klauzola e futbollistit të talentuar do të mbetet në të njëjtën shumë, një shifër që mbron edhe lojtarë si: Pedri, Gavi, Rafinja, Balde, Kunde, Ferran Torres dhe Ansu Fati. Të gjithë janë në nivelin e parë të klauzolave të lirimit, por skuadra ka tre rangje të tjera në këtë aspekt kontraktual.
Klauzolat– Niveli më i lartë i klauzolave të lirimit për skuadrën e Barçës është vendosur në 1 miliard euro. Tetë lojtarë të ekipit të parë e kanë këtë mbrojtje për të shmangur ofertat fitimprurëse nga klubet rivalë. Lamin Jamal është i fundit që ka nënshkruar një rinovim kontrate deri në vitin 2031, Pedri dhe Gavi kanë kontrata deri në vitin 2030, Rafinja dhe Balde kanë nënshkruar deri në vitin 2028 dhe Kunde, Ferran Torres dhe Ansu Fati kanë kontrata deri në vitin 2027.
Klauzola e dytë përfshin shtatë lojtarë të tjerë, me një klauzolë largimi prej 500 milionë eurosh. Në këtë listë të dytë futen Dani Olmo, i cili ka nënshkruar deri në vitin 2030, Pau Kubarsi dhe Fermín Lopez me kontrata deri në vitin 2029, kapiteni Ter Shtegen me një marrëveshje deri në vitin 2028 dhe kontratat e Levandovskit dhe Kristensen, që skadojnë në vitin 2026. Në rastin e Mark Bernal, gjithashtu në këtë nivel klauzole, kontrata e tij do të rinovohet deri në vitin 2029 kur ai të mbushë moshën madhore.
Injigo Martínez, De Jong, Erik Garsia dhe Injaki Penja janë katër lojtarët e ekipit të parë me një klauzolë largimi prej 400 milionë eurosh dhe rastësisht të gjithë kanë kontrata që zgjasin deri në vitin 2026.
Përtej fashave të mësipërme, te Barcelona ka dhe klauzola të tjera disi më të “buta”. Klauzolat e lirimit për katër nga lojtarët e rinj janë të vendosura në 100 milionë euro. Pablo Torre ka edhe një vit në kontratën e tij deri në vitin 2026, Kasado dhe Gerard Martín janë të lidhur me klubin deri në vitin 2028 dhe Pau Viktor ka nënshkruar deri në vitin 2029. Një kategori të veçantë e përbëjnë lojtarë si Arauho, Shezni dhe Hektor Fort, klauzolat e largimit të të cilëve nuk janë specifikuar.
