Ditën e sotme është mbajtur seanca e radhës e dosjes “Plumbi i Artë”, ku ka dëshmuar për herë të parë bashkëpunëtori tjetër i drejtësisë, Erion Alibej, i njohur me nofkën “Krymi”.
Fillimisht ai ka dëshmuar për autoritetet belge për vrasjen e Arjan Spahiut, i njohur si “Arjani i vogël”, teksa është vëllai i Endrit Alibejt, i cili u ekzekutuar në masakrën e Bradasheshit, ku rivalë kishin grupin e vëllezërve Franc dhe Hajdar Çopja, me të cilët kishin qenë bashkë fillimisht në trafikun e drogës në vendet e BE-së.
Erion Alibej akuzohet edhe si kreu i një organizate kriminale në Elbasan, porositëse e atentateve me pagesë për hakmarrje dhe motive që lidhen me krimin e organizuar, tek grupi i killerave që drejtonte i penduari Nuredin Dumani.
Në dëshminë e dhënë para togave të zeza, Erion Alibej ka rrëfyer njohjen me Nuredin Dumanin, ku tha se ky i fundit kishte shkuar vetë ta takonte, pasi kishte marrë vesh se ai ofronte 100 mijë euro për ta vrarë dhe 200 mijë euro për t’ia çuar të gjallë.
Dëshmia e Erion Alibej: Betohem që do të them të vërtetën. Jam me arsim të lartë. Kam qenë i dënuar në Itali, ndërsa në Shqipëri, sipas dëshmisë së penalitetit, rezultoj i pastër. Më 29 dhjetor të vitit 2018, në një atentat që ne si familje e quajmë ‘kamikaz’… (ndërpritet nga avokatët e të pandehurve të tjerë).
Me Nuredin Dumanin jam njohur pasi u lirova nga paraburgimi i Elbasanit, nga fillimi i vitit 2020. Arjan Spahiu kishte kontakt me anë të një personi të quajtur ‘Fati’. Kam qenë përdorues i aplikacioneve ‘EncroChat’ dhe ‘Sky EÇ’. Arjani më tha që Nuredin Dumani kishte kërkuar vetë të takohej me mua, sepse gjatë kësaj periudhe kisha përhapur fjalë në rrugë apo në shoqëri, se për Talo Çelën jepja 100 mijë euro për ta vrarë dhe 200 mijë euro për këdo që ma sillte të gjallë. Kjo gjë i kishte shkuar në vesh Dumanit.
Për Nuredinin bëra kërkime, kisha çdo informacion. Erdhi te pallati, në një shtëpi me qira që kisha marrë për djemtë e dajës tim. Qëndroi për 2 orë e 48 minuta. E regjistrova bisedën me Nuredin Dumanin. Më shpjegoi se kishte dëgjuar që kërkoja Talo Çelën dhe më tha se në dijeni për këtë ishin edhe Festim Qoli. I thashë: ‘Ok’, dhe më pas nisa bisedën duke i shpjeguar kush janë ekzekutorët e familjarëve të mi.
Ai theksoi gjithashtu pengesat që i ka krijuar një tjetër person në përpjekjet për zbardhjen e ngjarjeve, duke përmendur veçanërisht Eljo Bitrin.
“Eljo Bitri ma zvarriste takimin, kisha 2 muaj që e kërkoja, 90 % e kisha të zbardhur atë që i ndodhi familjarëve të mi, i nxora foto Dumanit, i thashë, ‘Vëllai jot Dashnor Dumani ka marrë pjesë në masakër.’ Nuredini nuk ma pranoi, tha s’ka lidhje Dashnori, i thashë të betohej në Kuran, të fal gjakun e vëllait vetëm me thuaj të vërtetën.
Unë i tregova internierarin e makinës që ishte qëlluar nga të dyja anët, më tha ka qenë edhe një Dorjan Shkoza dhe ka qenë me makinë tjetër dhe ka zbrit duke qëlluar tek ana tjetër. Nuredini kishte hall se Dorjan Shkoza po e ndiqte atë dhe Dashnorin me e ekzekutuar. Dumani më tha se kishte probleme vet me ata. Unë i thashë më intereson vetëm Talo Çela. Unë e dija që financuesit e urdhëruesit ishin në Dubai, vëllezërit Copja, miq të hershëm tanë,” – tha Alibej.
Në fund, ai bëri me dije lidhjet financiare dhe bashkëpunimin mes personave të përfshirë në krim: “Dumani më tha se Talo Çela shkon shumë edhe me Festim Qolin, më tha që për vrasjet unë marr gjysmën e lekëve. E pashë që nuk kishte telefon të enkriptuar, i shpjegova Arjanit që Nuredini s’ka Sky ECC, dhe i dhashë një iPhone 6 që kishte të instaluar Sky ECC, i dhashë dhe 50 mijë euro, e mësova dhe si përdoret Sky ECC.”
