Një 28-vjeçar është vënë në pranga nga Policia e Lushnjës, pasi u kap në posedim të armëve dhe lëndëve narkotike. Arrestimi u bë pas një kontrolli të ushtruar fillimisht në automjetin që ai drejtonte dhe më pas në banesën e tij.
Sipas njoftimit zyrtar të Policisë, gjatë kontrollit në automjetin e të riut u gjetën një sasi lënde narkotike e dyshuar Cannabis Sativa dhe një armë e ftohtë (thikë). Hetimet u zgjeruan edhe në banesën e tij, ku u sekuestruan një armë sportive dhe një sasi fishekësh.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme procedurale. 28-vjeçari do të përballet me akuzat për “Prodhim dhe shitje të narkotikëve”, “Mbajtje pa leje të armëve dhe municionit luftarak”, si dhe “Mbajtje pa leje të armëve të ftohta”.
