Cristian Brocchi, nga Milani te Lacio, ka qenë transferimi i parë i Igli Tares si drejtor sportiv i Lacios.
Ish-mesfushori e ka uruar shqiptarin për aventurën e re si drejtor i kuqezinjve, por është pyetur gjithashtu edhe nga sajtet pranë Milanit për njohjen me të.
“Unë e njoh personalisht Iglin dhe them që drejtorët sportivë nuk duhet të vlerësohen vetëm nga emrat e lojtarëve që transferojnë. Ndodh ndonjëherë që të mos japin më të mirën e tyre, por jo sepse drejtorët nuk e kanë parë mirë.
Ndoshta lojtari nuk është përshtatur për arsye nga më të ndryshmet. Ka shumë faktorë. Igli është një njeri i dhomës së zhveshjes dhe në kontakt të vazhdueshëm me lojtarët. Di kur të flasë, kur të mos flasë, kur të ngrejë zërin dhe kur jo.
Ka dhënë gjithmonë 100% në gjërat që ka bërë dhe i respekton të gjithë. Ka mentalitet fitues dhe Milani ka bërë zgjedhjen e duhur. Më kujtohet që në bisedën e parë me të nuk më foli as për taktikë dhe as për teknikë. Më tha vetëm që të çoja te Lacio mentalitetin fitues që kisha te Milani. Dhe pikërisht kjo gjë më bëri dhe më bindi që të pranoja”, tha Brocchi.
