Policia e Korçës ka arrestuar një person, i cili akuzohet si shpërndarës i dozave me kokainë dhe kanabis në qytetin e Maliqit dhe në fshatrat përreth.
Në kuadër të operacionit të koduar “Liboniku”, pas një hetimi një mujor, është vënë në pranga shtetasi Jurgen Beçoku, 39 vjeç, banues në Libonik të Maliqit. Ai akuzohet për veprat penale “Prodhimi dhe shitja e narkotikëve” dhe “Mbajtja pa leje dhe prodhimi i armëve, armëve shpërthyese dhe municionit”
“Gjatë operacionit, në fshatin Libonik, shërbimet e Policisë kanë lokalizuar dhe ndaluar automjetin me të cilin lëvizte shtetasi i dyshuar për shitjen e dozave. Gjatë kontrollit fizik ndaj shtetasit Jurgen Beçoku dhe kontrollit në automjet, shërbimet e Policisë gjetën një sasi lënde narkotike kokainë, të ndarë në doza, gati për shitje. Në vijim të veprimeve, gjatë kontrollit në banesën e këtij shtetasi u gjet një tjetër sasi kokaine, një sasi kanabisi, një peshore elektronike dhe një sasi municioni luftarak.” – thuhet në njoftimin e autoriteteve.
Policia thotë se në bashkëpunim me Prokurorinë vijon puna për identifikimin dhe arrestimin e shtetasve të tjerë që mund të jenë përfshirë në këtë veprimtari kriminale.
Materialet procedurale i janë referuar Prokurorisë së Korçës për veprime të mëtejshme.
