Presidenti i SHBA-së, Donald Trump, po i intensifikon sulmet e tij ndaj Vladimir Putinit, duke paralajmëruar se presidenti rus po luan me zjarrin. Përmes një postimi në platformën Truth Social, Trump pretendoi se nëse ai nuk do të ishte në pushtet, gjëra shumë të këqija do të kishin ndodhur tashmë në Rusi.
“Ajo që Vladimir Putin nuk e kupton është se nëse nuk do të isha unë, shumë gjëra të këqija do të kishin ndodhur tashmë në Rusi, dhe dua të them shumë keq”, shkroi presidenti amerikan.
Deklaratat e tij vijnë vetëm 24 orë pas sulmit verbal të Trump, i cili e përshkroi Putinin si plotësisht të çmendur në përgjigje të sulmeve të fundit ajrore të Moskës kundër Ukrainës.
Përgjigja e Kremlinit ishte e menjëhershme. Një zëdhënës i presidencës ruse i përshkroi deklaratat e Trump si mbingarkesë emocionale dhe mbrojti veprimet e Putinit, duke thënë se vendimet e tij janë absolutisht të nevojshme për sigurinë e Rusisë.
