Pas një sezoni zhgënjyes të Lazios që mbyll me vendin e shtatë dhe jashtë garave europiane për herë të parë pas tetë vitesh, klubi ka vendosur të ndahet nga trajneri Marco Baroni.
Në horizont është një rikthim befasues: Maurizio Sarri, ish-trajner i bardhekaltërve që dha dorëheqjen në mars 2024 për shkak të mosmarrëveshjeve me disa lojtarë, të cilët tashmë nuk janë më pjesë e skuadrës.
Presidenti Claudio Lotito dhe drejtori sportiv Angelo Fabiani po punojnë për të përmbyllur sa më shpejt marrëveshjen, duke i ofruar Sarrit një kontratë me pagë prej 2 milionë eurosh në vit.
Bisedimet janë tashmë në një fazë të avancuar dhe qëllimi është të përmbyllet gjithçka përpara se klubet e tjera të tentojnë ndërhyrje.
Sarri, i cili ka një marrëdhënie të mirë me ambientin roman dhe është i motivuar të rikthehet në stol, ka shprehur gatishmërinë për të udhëhequr projektin e ri të Lazios, që synon të fokusohet tek të rinjtë.
Njohja e mirë me pjesën më të madhe të skuadrës dhe fakti që Lazio do të ketë vetëm një ndeshje në javë, do ta ndihmonin për të implementuar më shpejt filozofinë e tij.
Rikthimi i “Komandantit” do të ishte një sinjal i fortë për tifozët dhe një përpjekje e klubit për të nisur një epokë të re pas një viti të vështirë.
