Kapiteni i Interit, Lautaro Martínez, ka folur për “Sky Sport” përpara finales së Champions League kundër PSG-së.
Sulmuesi argjentinas ka theksuar pjekurinë dhe përgatitjen e skuadrës krahasuar me finalen e Stambollit të humbur 1-0 ndaj Manchester City-t dy vite më parë.
“Këtë herë arrijmë me më shumë përvojë se sa në Stamboll. Dy vite më parë luajtëm një finale të rëndësishme kundër një skuadre të madhe.
E humbëm, por kemi pasur shumë rritje dhe jemi pjekur. Tani arrijmë në këtë finale në mënyrë perfekte nga të gjitha këndvështrimet. Skuadra është thuajse e njëjtë me atë të finales së Stambollit. E dimë që do të jetë e vështirë, por kemi treguar shpirt sakrifice dhe unitet. E kemi merituar ta luajmë këtë finale pas dy vitesh. Tani mungon vetëm edhe një hap…”
Çfarë lë pas vetes humbja në kampionat?
Tri ditët e para ndjeva hidhërim dhe trishtim, unë e jetoj futbollin kështu. Nuk më pëlqen të humbas dhe kur ndodh, ndihem keq për disa ditë. Tani kemi një sfidë shumë të rëndësishme përpara, nuk ka kohë për t’u qarë, duhet vetëm të përgatitemi për këtë finale dhe ëndërr. Këtë sezon kemi bërë një punë të madhe, e kemi merituar finalen e Mynihut.
Si ndihesh personalisht para ndeshjes?
Të gjithë duhet të japim maksimumin, nga ata që hyjnë në fushë, tek ata që do jenë në stol apo tribunë. Është ajo energji pozitive që të bën të fitosh. Ne duhet të lëmë pas gjithçka që ka ndodhur në kampionat. Dua të fitoj me gjithë zemër, për veten time, për familjen time dhe mbi të gjitha për gjithë tifozët e Interit dhe këtë klub të madh që më ka adoptuar që në ditën e parë.
Nga kush do doje të merrje një telefonatë para ndeshjes?
Kam familjen afër, për mua është gjëja më e rëndësishme në jetë. Gjyshja ime nuk është mirë në këtë moment, mendoj për të, për fëmijët e mi… Kjo më mban të fortë.
