Nga Boldnews.al
Në ditët e fundit të fushatës elektorale të 11 Majit 2025, kryeministri Edi Rama, duke prezantuar atë që e konsideroi si “fluturimi përurues në Aeroportin e ri të Vlorës”, iu drejtua kritikëve të tij që e shohin këtë projekt qindra miliona euro të ngjashëm me një investim jo-funksional në aeroportin e Kukësit.
“Për ata që thonë se ky është fluturim ‘fake’, që bëhet për propagandë dhe pastaj aeroporti do të mbetet si Kukësi: Do të kemi së shpejti një kompani të re shqiptare që do të nisë fluturimet në aeroportin e Kukësit. “Air Kosova” do të jetë kjo kompani, me dy avionë të krenarisë sonë të përbashkët”, deklaroi ai nga Vlora në 8 maj të këtij viti.
Qeveria e Edi Ramës, e cila drejton vendin prej vitit 2013, i ka konsideruar si prioritete madhore investimet në ndërtimin e dy aeroporteve lokalë, në Kukës e Vlorë, megjithëse sipërfaqja e vogël e Shqipërisë dhe burimet e kufizuara turistike krahasuar me vendet fqinje, i bën ato, në mos të panevojshëm, aspak rentabël.
Në një plan afat-mesëm, dy kontratat koncesionare për ndërtimin e aeroporteve lokale, ai i Kukësit me kosto 8 milionë euro dhe ai i Vlorës me kosto 140 milionë euro, mund të përfundojë në një lloj “çorbe oligarkësh” dhe të ngjashme me investimet jo-funsionale të inceneratorëve.
Sinjali i parë është dhënë nga Aeroporti i Kukësit. Katër vjet më parë, gjatë fushatës elektorale të zgjedhjeve parlamentare të vitit 2021, kryeministri Rama ishte i pranishëm në “fluturimin inagurues” të aeroportit në qytetin verior. Prej asaj kohe, aeroporti i Kukësit nuk ka funksionuar.
Ngjashëm ka gjasë të ndodhë edhe me aeroportin e Vlorës. “Fluturimi inagurues” i majit 2025 nuk i jep aspak përgjigje problemeve teknike, ambjentale, por edhe funksionale të këtij investimi.
Aeroporti i Kukësi i Kastratit
Në janar të vitit 2019, Ministria e Infrastrukturës dhe Energjisë (MIE) shpalli bashkimin e operatorëve “Global Technical Mechanics” dhe “Bami” shpk fitues të kontratës për “Dhënien me koncesion/PPP të Aeroportit të Kukësit.
Kontrata u miratua në mars të atij viti nga Këshilli i Ministrave, në një mbledhje të drejtuar nga zv.kryeministri i asaj kohe, Erion Braçe. Ndërtimi i pistës së aeroportit është raportuar si i përfunduar nga koncesionari në vitin 2021.
Kompania kryesore e konsorciumit fitues është “Global Technical Mechanics”, në pronësi formale të Ridgers Mema. Por, pas tij duket se fshihet kompania “Kastrati”, e cila, gjatë qeverisjes së Edi Ramës, është shtrirë në thuajse të gjithë sektorët kryesorë të ekonomisë, përfshirë karburantet, transportin dhe ndërtimin.
Kompania “Kastrati” është menaxhuese e aeroportit të vetëm ndërkombëtar (dhe funksional) në Shqipëri, “Nënë Tereza”, në Tiranë.
Ridgers Mema, i cili është edhe administrator i shoqërisë koncesionare “Kukës International Airport”, rezulton drejtues i Zhvillimit të Biznesit pranë “Kastrati Group”.
Prej janarit 2025, Mema është pronar fundor i shoqërisë “Air Kosova”, e njëjta, e cila u prezantua me nota patriotizmi nga kryeministri Rama gjatë “fluturimit inagurues” në aeroportin e Vlorës.
“Aeroporti Ndërkombëtar i Kukësit “Zayed” mirëpriti fluturimin e tij të parë në 18 Prill me Kryeministrin e Shqipërisë Edi Rama në bord. Një avion i Air Albania fluturoi nga kryeqyteti Tirana, rreth 150 kilometra larg, në aeroportin që është ringritur me ndihmën e Emirateve të Bashkuara Arabe”, thuhej në njoftimin e kompanisë koncesionare dhe të qeverisë shqiptare në vitin 2021 .
Por, pas këtij fluturimi, nga aeroporti i Kukësit pati vetëm heshtje. Rama e justifikioi mosfunksionimin 4-vjeçar të këtij investimi me probleme teknike. “Ai aeroport ka pasur sfidë më vete për sigurimin e operatorëve, ka problematikë me korridorin e uljes, nuk është aeroport i thjeshtë. Nuk është gjetur në kohë një “akullthyes” që do të dëshmojë se ai aeroport ia vlen”, deklaroi pak javë më parë kreu i qeverisë.
“Vlonjati” Behgjet Pacolli
Biznesmeni i fuqishëm kosovar, Behgjet Pacolli, ka nisur të shndërrohet në një lloj “vlonjati”, pasi po zgjeron investimet e tij në pasuri të paluajtshme në qytetin jugor, pasi kompania e tij, “Mabetex” është pjesë e konsorciumit që fitoi kontratën koncesionare për ndërtimin e aeroportit në zonën e Akërnisë.
Në mars të vitit 2021, Ministria e Infrastrukturës dhe Energjisë shpalli rezultatet e procedurës me objekt “Dhënie me koncesion e aeroportit të Vlorës”, me kosto rreth 140 milionë euro.
Konsorciumi fitues përbëhet nga “Mabco Construction” e Mabetex” të Behgjet Pacollit, si edhe nga një bashkimi i dy kompanive turke e shqiptare, “YDA Insaat Sanayi Ve Ticaret Anonim Sirketi & 2A Group sh.p.k.
Procedura koncesionare është shoqëruar me dyshime të shumta dhe me beteja ligjore, por, në fund, qeveria shqiptare nënshkroi kontratën me grupin e drejtuar nga Pacolli.
Idea dhe më pas ndërtimi i aeroportit të Vlorës është kundërshtuar fuqishëm nga grupime ambjentalistësh vendas e të huaj, pasi ky investim dëmton rëndë biodiversitetin dhe sjell rreziqe të shtuara për fluturimet.
Megjithatë, kryeministri Rama nuk është ndaluar përballë këtyre kritikave, duke vijuar zbatimin e kontratës me “mikun e tij të ngushtë”, Behgjet Pacolli.
Në 8 Maj 2025, Rama dhe Pacolli ishte së bashku në “fluturimin inagurues” të aeroportit të Vlorës. Media e pranishëm në këtë event u ndalua t’i afrohej pistës dhe pamjet e uljes së një çarteri të vogël u filmuan nga një largësi e madhe, e ngjashme me distancat që regjistrohen në ngritjen e anijeve kozmike në Cape Canaveral të Floridas, në SHBA.
Pamjet e shpërndara nga regjia qendrore e Kryeministrisë dhanë edhe avionin personal të Pacollit, që kishte zbritur në pistën e aeroportit të Vlorës.
Paralelisht me ndërtimin e aeroportit të Vlorës, kompania “Mabco” e Pacollit tashmë është shtrirë në sektorë të tjerë rreth zonës. Prej vitit 2022, kompania e tij është përfshirë në “zhvillimin e projekteve të ndërtimit, investimet në fushen e hotelit, turizmit, vendpushimeve turistike, agrobiznesit, etj…”.
Gjithashtu, edhe shoqëria e tij kryesore shqiptare, “Mabetex Invest”, gjendet prej vitit 2021 në sektorin e ndërtimit dhe turizmit.
Në çdo rast, edhe nëse aeroporti i Vlorës nuk do të ndjejë zhurmën e avionëve, tashmë Pacolli është shndërruar në “vlonjatin më të ri”.
