Igli Tare ulet këtë pasdite në zyrën e tij të re në “Casa Milan” si drejtor sportiv i kuqezinjve dhe mbi tryezë do ta presin menjëherë një sërë çështjesh të ndërlikuara. Pas largimit të Massarës dhe Maldinit, roli i drejtorit sportiv kishte mbetur bosh dhe tani është radha e Tares për të marrë në dorë fatet e merkatos dhe projektit të ardhshëm të Milanit.
Detyra më urgjente? Zgjedhja e trajnerit të ri. Dhe situata nuk është aspak e lehtë. Kandidatët e mundshëm po zvogëlohen dita-ditës: Italiano është pranë rinovimit me Bologna-n, Gasperini ka gjasa të mbetet në Bergamo, Conte është gjithmonë më afër një rikthimi tek Juventusi, ndërsa Allegri ndodhet në dilemë mes Napolit dhe ndoshta një rikthimi te Interi në rast largimi të Inzaghit.
Emrat e lirë si Roberto Mancini dhe Thiago Motta nuk ngjallin shumë entuziazëm: i pari vjen pas një përvoje të vakët në Arabinë Saudite, i dyti u shkarkua nga Juventusi vetëm pak muaj pas emërimit. De Zerbi duket se do të qëndrojë në Marsejë, Farioli nuk bind, ndërsa Fabregas është më pranë Romës ose Interit.
Kjo paqartësi për profilin e trajnerit, nga të rinjtë tek veteranët, vetëm sa shton dyshimet për koherencën e projektit sportiv.
Por problemi nuk mbaron këtu. Sapo të zgjidhet çështja e trajnerit, Tare do të duhet të merret me situatën e kontratave dhe me tregun e largimeve. Objektivi i parë do të ishte ruajtja e ‘yjeve’, por ky duket një mision i pamundur për shkak të bilancit negativ pas dështimit për të hyrë në Champions League.
Lojtari që mund të sjellë menjëherë të ardhura të mëdha është Reijnders: Manchester City pritet të paraqesë një ofertë prej rreth 50 milionë eurosh. Nëse shifra arrin në 70, atëherë edhe një “jo” për Guardiolën bëhet e vështirë, përveç nëse klubi arrin të shesë lojtarë të tjerë si Chukwueze, Thiaw, Musah apo edhe Theo Hernandez. Po ashtu mund të llogaritet edhe nga ndonjë përfitim nga shitja përfundimtare e lojtarëve në huazim, si Kalulu, Saelemaekers apo Pobega.
Mbajtja e Reijnders mbetet e mundur, për aq kohë sa vetë lojtari nuk kërkon largimin. Por në rastin e rinovimeve të kontratave, gjërat janë më të ndërlikuara. Theo Hernandez nuk duket se do të rinovojë. Maignan, që kishte një akord paraprak në janar, është ftohur për shkak të mungesës së kontakteve në muajt në vijim dhe mund të largohet – Manchester United është i interesuar. Rafa Leao, megjithëse ka ende kontratë të vlefshme, është futur në radarët e Bayern-it. Edhe Pulisic, një tjetër element kyç këtë sezon, është në pritje për të parë kush do jetë trajneri i ri.
Sepse gjithçka, në fund të fundit, nis nga aty: kush do të udhëheqë rilindjen e Milanit? Kjo është pyetja më e madhe që pret përgjigje nga Igli Tare, përpara një vere që parashikohet më e zjarrta në vitet e fundit në Milano.
