Me emocione dhe ambicie të qarta, Carlo Ancelotti është prezantuar zyrtarisht si trajneri i ri i kombëtares së Brazilit, vetëm pak ditë pasi përshëndeti Real Madridin dhe u largua nga ‘Santiago Bernabeu’.
“Është krenari e madhe të udhëheqësh kombëtaren më të mirë në botë,” u shpreh trajneri italian në konferencën e tij të parë për shtyp. “Kam shumë dëshirë që ta shoh Brazilin përsëri kampion bote. Jam pritur me shumë dashuri dhe kjo është një punë me përgjegjësi të madhe.”
Me 65 vite mbi supe dhe një karrierë të mbushur me trofe, Ancelotti nis kështu një kapitull të ri, këtë herë në drejtimin e “Seleção”-s. Ai ka marrë edhe “bekimin” e dy legjendave si Luiz Felipe Scolari dhe Carlos Alberto Parreira, të dy kampionë bote në pankinën braziliane.
“Falënderoj CBF-në dhe Real Madridin që më dhanë mundësinë të jem këtu sot. Kam pasur gjithmonë një lidhje të veçantë me Brazilin. Kam stërvitur më shumë se 34 lojtarë brazilianë gjatë karrierës sime: nga Ronaldo, Rivaldo e Kaká, te Rodrygo e Endrick. Dhe tani, më në fund, do të jetoj në Rio, një qytet që gjithmonë e kam dashur, por nuk e kam përjetuar nga afër,” vazhdoi Ancelotti.
Për orët e para si trajner i Brazilit, italiani theksoi rëndësinë e një ambienti të shëndetshëm për ekipin:
“Kemi vlerësuar strukturat e federatës. Është thelbësore të krijojmë një mjedis familjar dhe me respekt, që të mund të nxjerrim versionin tonë më të mirë. Është një sfidë shumë e madhe.”
Në fund, një mesazh i fortë për objektivin madhor:
“Të fitosh Kupën e Botës duhet të jetë një detyrim për këtë vend. Kjo qasje mund të na ndihmojë shumë në sfidën që na pret verën e ardhshme.”
Brazilit i hapet kështu një faqe e re, me një strateg dhe fitues të lindur në krye. Objektivi është i qartë: rikthimi në majën e futbollit botëror.
