Jo më kot futbolli njihet ndryshe si sporti më popullor në botë. Është një disiplinë e shtrirë gjerësisht në të gjithë botën, ku padyshim përjashtim nuk bën as Shqipëria.
Futboll luhet kudo në vendin tonë dhe në pjesën më të madhe të saj, në qytete, ka ekipe që përfaqësojnë territorin ku bëjnë pjesë. Më konkretisht, vendi ynë pas ndarjes së fundit territoriale 10 vjet më parë ka 61 bashki, ku në 46 prej tyre ka të paktën një skuadër futbolli që sezonin e fundit që lamë pas ka marrë pjesë në një nga kampionatet që zhvillohen nga ana e FSHF-së, duke përfshirë Kategorinë Superiore, Kategorinë e Parë, Kategorinë e Dytë dhe Kategorinë e Tretë.
QYTETET PA FUTBOLL- Edhe pse në Shqipëri futbolli është i pari ndër sportet e preferuara dhe me përkrahjen më të madhe nga ana financiare, sërish nuk luhet në çdo cep të tij. Ose, më saktë, jo të gjitha qytetet kanë një ekip futbolli të rriturish.
“Panorama Sport” i ka bërë një hulumtim situatës me klubet në vendin tonë, ku bie në sy se janë plot 15 qytete të vendit tonë që janë të pa përfaqësuar në asnjë nga kampionatet zyrtare të të gjitha niveleve që njihen.
Disa janë qytete të mëdha dhe që e kanë pasur një ekip futbolli, ndërsa të tjera janë me pak banorë që ndoshta nuk e kanë në “hesap” krijimin e një skuadre futbolli.
Rasti më fatkeq dhe i dhimbshëm nga qytetet që nuk kanë një ekip, është ai i Kamzës. Një qytet me 125 mijë e 632 banorë, nuk bën tifozllëk për skuadrën që t’i përfaqësojë, për shkak se është shkrirë para disa vitesh.
Për momentin, nuk ka asnjë sinjal për krijimin ose kthimin e ekipit të vjetër. Për të vijuar më pas me disa qytete të tjera, si Divjaka apo Prrenjasi, që gjithashtu kanë një numër të konsiderueshëm banorësh. Listën prej 15 qytetesh pa futboll e mbyll Bashkia e Pustecit në Qarkun e Korçës, e cila ka vetëm 1 mijë e 843 banorë.
POPULLSIA E PAPËRFAQËSUAR – Mungesa e një ekipi futbolli, rrjedhimisht sjell edhe mos përfaqësimin e qytetarëve të saj në këtë sport. Duke iu referuar shifrave të censit të fundit, bëhet fjalë për 280 mijë e 444 banorë që janë rezidentë në këto bashki. Censi i fundit tregoi se në vendin tonë jetojnë 2 milionë e 402 mijë e 113 banorë dhe rrjedhimisht i bie që pak më shumë se 10% e popullsisë së vendit tonë nuk përfaqësohet me asnjë ekip futbolli.
QARQET – Nga 12-të qarqe që ka vendi ynë, në 10 prej tyre ka të paktën një qytet që nuk kanë aktualisht një ekip futbolli. Përjashtim bëjnë vetëm dy prej tyre që përfaqësohen me një ekip futbolli nga të gjitha qytetet. Bëhet fjalë për Qarkun e Durrësit dhe atë të Dibrës, ku çdo banor i tyre është i përfaqësuar me ekipin e qytetit ku aderojnë./Panoramasport
