Largimi i Carlo Ancelottit nga Real Madridi mbyll një epokë të sukseseve të mëdha.
Trajneri italian ka drejtuar “Los Blancos” në dy periudha, fillimisht nga viti 2013 deri në 2015 dhe më pas nga 2021 deri më 2025, duke shkruar një nga periudhat më të lavdishme të klubit merengues me plot 15 tituj, përfshirë 3 Champions League.
Asnjë trajner tjetër në historinë e “Los Blancos” nuk ka arritur kaq shumë suksese.
Të pashmangshme, pra, falënderimet e shumta, që kanë pasuar atë të Florentino Perezit. Ylli francez Kylian Mbappé, i stërvitur nga Ancelotti vetëm këtë sezon të fundit, shkroi në profilin e tij në Instagram:
“Mister, sot është dita e fundit e aventurës tënde të jashtëzakonshme me klubin. Faleminderit ty dhe stafit tënd për gjithçka që keni bërë për mua që nga dita e parë. Ka qenë një nder i madh të kem një trajner si ti. Të uroj më të mirat për të ardhmen”.
Mesazh i ngjashëm edhe nga mesfushori anglez Jude Bellingham: “Mister, faleminderit për gjithçka. Ka qenë kënaqësi dhe përvojë e madhe të mësoj nga trajneri më i suksesshëm i klubit tonë dhe një nga më të mëdhenjtë e të gjitha kohërave. Ajo që më ke mësuar për jetën dhe futbollin do të mbetet me mua gjithmonë. Do të të jem gjithmonë mirënjohës. Fat të mbarë në udhëtimin tënd të ardhshëm. Të uroj ty, stafit dhe familjes sate vetëm lumturi!”
Mesazh shumë i bukur edhe nga braziliani Vinicius Jr., gjithmonë i preferuar i Ancelottit, i cili shpesh e ka mbrojtur për sjelljet e tij impulsive në fushë dhe që do ta ritakojë në drejtimin e Brazilit:
“Faleminderit, mister. JE MË I MIRI. Që nga ardhja jote në Madrid, jeta ime si lojtar dhe si person ka ndryshuar.
Më dhe besim, më ndihmove të rritem dhe ishe pranë meje në çdo moment, brenda dhe jashtë fushës. Fituam dy Champions, dy La Liga dhe shumë tituj të tjerë…, por ajo që vlerësoj më shumë është mënyra se si më trajtove, thjeshtësia jote dhe mënyra si i menaxhove të gjithë këto vite.
Ndërtuam diçka përtej futbollit. Më ke mbrojtur dhe më ke qëndruar pranë kur më është dashur më shumë. Sot është e vështirë të të them lamtumirë. Dhoma e zhveshjes në Madrid do ta ndiejë mungesën tënde. Do më mungosh. Sidoqoftë, në të njëjtën kohë, jam i lumtur që tashmë kemi një datë për t’u ribashkuar; tani me fanellën e përfaqësueses së Brazilit. Ky është fati. Të pres në BRAZIL”.
