Mohamed Salah ka fituar çmimin prestigjioz ‘Lojtari i Sezonit 2024/25’ nga EA SPORTS, duke u bërë vetëm lojtari i pestë në historinë e Premier League që e fiton këtë çmim më shumë se një herë.
Sulmuesi egjiptian, i cili e kishte fituar për herë të parë këtë çmim në sezonin 2017/18, ka shkëlqyer edhe këtë vit, duke e udhëhequr Liverpool-in drejt titullit të dytë të Ligës Premier dhe duke lënë pas një sezon të jashtëzakonshëm individualisht.
Me këtë arritje, Salah shënon një tjetër moment historik në karrierën e tij, ndërsa synon të bëhet lojtari i parë që e fiton çmimin për herë të tretë, pas nënshkrimit të një kontrate të re me klubin.
32-vjeçari vazhdon të thyejë rekorde: ai është ngjitur në vendin e tretë në listën e golashënuesve më të mirë të të gjitha kohërave te Liverpool dhe renditet i pesti në historinë e Premier League me 185 gola, duke kaluar edhe legjenda si Thierry Henry dhe Frank Lampard.
Salah gjithashtu ka shkruar historinë si lojtari i huaj me më shumë gola në Ligën Premier, duke lënë pas Sergio Agueron (184 gola), një tjetër ikonë e kampionatit anglez.
