Presidenti i Barcelonës, Joan Laporta, ka dhënë një intervistë në “TV3”.
Në të, numri një i klubit katalanas ka folur për të gjitha temat, duke nisur që nga letra që ai i shkroi trajnerit Hansi Flick pas mbërritjes së gjermanit në krye të Barcelonës.
Letra për Flick – “Shkuam për darkë me Bojanin (Kërkiç), Dekon dhe Masipin kur ai mbërriti. Përveçse i shpjegova gjithçka rreth Barçës, i lashë edhe një letër. Shoh që e ka lexuar dhe e mbaj mend”.
Urimet nga Reali – “Nuk i kam parë të gjitha mesazhet, por Reali i Madridit sillet shumë institucionalisht. Kam tri ditë që festoj; kemi përjetuar paradën e emocioneve”.
Festimet në rrugë – “Është ajo ku kam parë më shumë lidhje me njerëzit, sepse kishte njerëz të të gjitha moshave që e duan Barcelonën”.
Stadiumi– “Mendoj se ndeshja kundër Vijarrealit ishte e fundit në ‘Montjuiç’. Nëse nuk do të ketë të papritura ose ndonjë gjë që nuk e kemi planifikuar, do të shkojmë në ‘Camp Nou’. Duam të bëjmë një provë të madhe pilot më 9 ose 10 gusht në stadiumin e rinovuar me rastin e trofeut ‘Gamper’. Ky do të jetë testi për të parë se si po shkon stadiumi. Ne jemi planifikuar të luajmë ndeshjen tonë të parë atje në fund të shtatorit”.
Yamal dhe rinovimi– “Gjithmonë duhet të vuash… Nuk mund të bënte përjashtim as me Jamalin. Tashmë jemi mësuar me të tilla gjëra. Është punuar shumë për këtë dhe duket se do të shkojë mirë, sepse Lamin është një lojtar i shkëlqyer dhe një person i jashtëzakonshëm, që e do Barcelonën. Pa dyshim është edhe më i pjekur, pavarësisht moshës së tij fare të re. Le të shpresojmë se do të ketë mirëkuptim midis palëve. Dhe si për lojtarin, ashtu edhe për mjedisin në të cilin ndodhet, si përfaqësues dhe si familje, ka një ndjenjë të mirë. Ai është katalan, një tifoz i Barcelonës plotësisht, dhe ai identifikohet me ta. Mendoj se është këshilluar mirë”.
De Jong – “Ai dëshiron të qëndrojë. Rinovimi i kontratës është urgjent dhe ai e di që jemi të interesuar. E shoh të entuziazmuar”.
Lewandowski – “Do të ketë lëvizje dhe ne duhet t’i vlerësojmë ato. Rivalët tanë do të forcohen sepse kanë parë që Barça ka dominuar lojën dhe se nuk janë vetëm individët që kanë rëndësi. Ne duhet ta vlerësojmë atë që kemi. Duhet t’i zgjidhim problemet me Injigon, De Jongun, Rafinjën dhe Jamalin. Dhe pastaj, bazuar në atë që kam dëgjuar nga Hansi dhe Deko, e di që do të ketë nënshkrime të reja”.
Haaland– “Në jetë, pothuajse asgjë nuk është e pamundur, por kjo nuk është ajo për të cilën po mendojmë tani”.
Arbitrat – “Është krijuar një komitet për të përmirësuar arbitrimin. Strategjia jonë është të ankohemi pak”.
