Më 7 maj të këtij viti, rreth mesditës, në fshatin Tpla të Krumës në Has ndodhi një vrasje. 41-vjeçari Ylber Jaku vrau komshiun e tij 34-vjeçar, Reshit Sallahun. Por çfarë kishte pas kësaj vrasjeje?
Babai i autorit të vrasjes Agim Jaku, tregon për emisionin “Stop” se familja e tij ka një konflikt me fqinjët Sallahu që nga viti 2007 për një rrugë kalimi. Situata ishte rënduar tre vitet e fundit për kanalin vaditës që ndante pronën e Jakut dhe Sallahut. Agimi thotë se është kërcënuar dhe dhunuar ai dhe familjarët e tij disa herë.
Vajza e Agimit jeton prej vitesh jashtë Shqipërisë. Ajo tregon se gati 3 javë para vrasjes, në prill 2025, ishte kthyer në Shqipëri për të takuar familjen. Atë ditë ajo është kërcënuar dhe ofenduar nga viktima, djali i familjes Sallahu. Zonja kërkoi ndihmën e policisë që e përcolli në komisariatin e Krumës, ku as u prit e as u dëgjua.
Vajza e familjes Jaku: Më vjen shumë keq, njëherë që ndodhi me mua dhe në radhë të dytë që ndodh me prindërit e mi vazhdimisht. Prindërit e mi shahen, ofendohen dhe ka ndodhur edhe në prezencën e policisë… Si e komentoni këtë gjë? Çfarë duhet të bëj?
Inspektori Fatmir Çaushi: Unë quhem Fatmir Çaushi! Jam inspektor rendi, jam i gatshëm sot bashkë me kolegët e mi. Shtetasi Agim Jaku ka bërë një telefonatë ku kërkon për ndihmë për një kanal. Unë jam në dijeni të konfliktit që ka familja e babait tënd me famijen e këtij zotërisë. Këto janë konflikte që jo i di unë, i di prokurori e gjykatë, i dinë te kryeministri e më poshtë. Ne jemi një hallkë e shtetit, ligjzbatues, nuk japim drejtësi, parandalojmë konflikte. Për sharje, për fyerje, për kanosje, po aty je e mirëpritur 24 orë në komisariatin …ëëë.
Vajza e familjes Jaku: Për atë telefonova…
Inspektori Fatmir Çaushi: Që të kanë kërcënuar, hajde në komisariatin e policisë, bëni kallëzim tek OPGJ, OPGJ kryen veprimet proceduriale.
Të nesërmen ajo u drejtua në Prokurorinë e Kukësit, ku u prit nga prokurorja e gatshme, por sërish nuk gjeti zgjidhje. Prokurorja i tha se ishte në dijeni për konfliktin e dy familjeve dhe e këshilloi t’i drejtohej gjykatës për fyerjet dhe ofendimet që kishte marrë nga viktima një ditë më parë.
Vajza e familjes Jaku: Unë vij nga Hasi për të bërë një kallëzim. Më kanë drejtuar për në Kukës, nuk ma kanë pranuar kallzimin në komisariat, më kanë drejtuar për në Kukës dhe konkretisht me zonjën Vima Kapaj.Tani, familja ime ka një problem të vjetër me komshinjtë që ne në mënyrë të vazhdueshme kërcënohemi, shahemi, ofendohemi nga ata dhe kjo gjë ka ndodhur dje. Unë kam ardhur me pushime, nuk jetoj në Has dhe njoftova policinë, si diçka që të gjejnë një zgjidhje, ta thërrasin, t’ia tërheqin pak veshin që të mos përdorin këto fjalë, gjëra të tilla dhe s’po merren fare masa….
Prokurorja Vilma Kapaj: Unë kam folur me oficerin që më përcolli edhe shqetësimin tuaj, por procedura në fakt nuk ndiqet nga ne si organ akuze, por duhet të bëni kërkesë direkt në gjykatë.
Një ditë para vrasjes, më 6 maj, babai i autorit të ngjarjes, Agim Jaku, po shkonte me makinën e tij në shtëpi për të marrë gruan dhe për të shkuar në një ceremoni mortore. Ai mori gruan në makinë dhe në momentin që do të niseshin goditen me sëpatë nga vajza e komshiut, 21-vjeçarja Artjola Sallahu.
Të moshuarit përfunduan pa ndjenja dhe i dërguan me plagë në Spitalin e Traumës në Tiranë. Pasi u përmend, Agimi njofton djalin, Ylber Jaku, duke i thënë se kishte bërë aksident me makinë. Por 41- vjeçari Ylberi Jaku e kishte marrë lajmin nga mediat që prindërit ishin masakruar. Ai i vizitoi në spital dhe u largua në fshatin Tpla në Krumë. Agimi lajmëroi policinë e Krumës, shefin e komisariatit dhe shefin e krimeve, por asnjë masë nuk u mor.
Shefi i krimeve Petrit Mustafa: Po, o gazetar! Të lutem! Shumë faleminderit, që more edhe policia është në shërbim të komunitetit! Ju lutem, për çdo lloj informacioni, bëni kërkesë pranë Drejtorisë Vendore të Policisë Krumë…!
Sipas informacioneve, Ylber Jaku me një armë priste në kushtet e depresionit psikologjik të hakmerrej ndaj djalit të familjes që i masakroi prindërit.
Sipas ekspertëve, vrasja do të ishte parandaluar sikur shefi i komisariatit ose shefi i krimeve, do të kishin shkuar apo çuar një patrullë policie në shtëpinë e Agimit. Tragjedia ka ndodhur si rrjedhojë e mosfunksionimit të institucioneve.
/Emisioni “Stop”
