Një transportues i ri kinez i dronëve që mund të lëshojë deri në 100 dronë më të vegjël në të njëjtën kohë mund të ngrihet në qiell për një fluturim provë brenda pak ditësh, tha transmetuesi shtetëror CCTV.
“Anija mëmë me dron” pa pilot, e njohur si Jiu Tian ose Nëntë Qiej, do të vendoset në shërbim nga forcat ajrore të Ushtrisë Çlirimtare të Popullit (PLA) dhe synon të hedhë themelet për të zgjeruar shtrirjen e luftimeve ajrore.
Kur të jetë plotësisht funksional, Jiu Tian do të lëshojë një mori dronësh që do të punojnë së bashku për të mposhtur sistemet e mbrojtjes ajrore të armikut.
Droni me motor reaktiv do t’i nënshtrohet së pari një sërë testesh përpara se të vendoset plotësisht në përdorim nga forcat ajrore kineze.
Jiu Tian, një aeroplan me lartësi super të madhe, mund të mbajë deri në gjashtë ton municione dhe dronë më të vegjël, ndërsa droni ka një rreze maksimale prej 7,000 kilometrash.
Jiu Tian është shtesa më e fundit në arsenalin kinez të teknologjisë së përparuar të dronëve, që po zhvillohet me shpejtësi, me mjetet ajrore pa pilot (UAV) që po bëhen gjithnjë e më të rëndësishme në fushën e betejës moderne.
“Anija mëmë” kineze e re po shihet si një rivale e modeleve të vendosura amerikane si RQ-4 Global Hawk dhe MQ-9 Reaper, sipas një artikulli të botuar në South China Morning Post.
Jiu Tian u projektua nga Korporata shtetërore e Industrisë së Aviacionit të Kinës dhe u ndërtua nga Xi’an Chida Aircraft Parts Manufacturing.
Prodhuesi thotë se dizajni i Jiu Tian i lejon dronit të kryejë disa funksione të ndryshme, të tilla si transporti me siguri të lartë, mbrojtja kufitare dhe operacionet e shpëtimit emergjent.
