Ati i Shenjtë, pas përfundimit të Meshës së inaugurimit të tij në Vatikan, ka zhvilluar një takim me Presidentin e Ukrainës, Volodymyr Zelensky.
Papa Leo XIV përdori meshën e tij për të adresuar shqetësimet e tij për luftën në Ukrainë, e për të treguar mbështetjen e Kishës ndaj Zelensky, teksa bëri thirrje për armëpushim.
Zelensky falenderoi Atin e Shenjtë për mbështetjen e tij për Ukrainën, përmes një postimi në platformën “X’, nga ku dhe ndau foto nga takimi i tyre. Presidenti i Ukrainës shkruan se Papa Leo XIV mund të luajë rol të rëndësishëm në përfundimin e kësaj lufte. Ai po kështu shprehu mirënjohje ndaj Vatikanit për gatishmërinë e saj për të qenë pjesë e negociatave mes Ukrainës dhe Rusisë.
“Pas Meshës së Inaugurimit, patëm një takim me Papën Leo XIV @Pontifex. I jemi mirënjohës Shenjtërisë së Tij për audiencën. Për miliona njerëz në mbarë botën, Papa është një simbol i shpresës për paqe. Autoriteti dhe zëri i Selisë së Shenjtë mund të luajnë një rol të rëndësishëm në përfundimin e kësaj lufte. Falënderojmë Vatikanin për gatishmërinë e tij për të shërbyer si një platformë për negociata të drejtpërdrejta midis Ukrainës dhe Rusisë. Jemi të gatshëm për dialog në çdo format për hir të rezultateve të prekshme. Vlerësojmë mbështetjen për Ukrainën dhe zërin e qartë në mbrojtje të një paqeje të drejtë dhe të qëndrueshme”, shkruan Zelensky në “X”.
