Arsid Kruja është një tjetër lojtar që mund të braktisë Teutën dhe të firmosë për ekipin e Dinamos.
Shkodrani ende nuk ka arritur një marrëveshje për rinovim, duke e lënë të hapur të ardhmen e tij, qoftë për një qëndrim të mundshëm, apo edhe për një aventurë të re jashtë Durrësit.
Mesfushori, që sezonin e fundit ishte pjesë e durrsakëve në kampionatin e fundit, po shqyrton të gjitha opsionet e mundshme për sezonin e ardhshëm dhe ndoshta në fundjavë mund të ketë një takim me presidencën e Teutës për të mbyllur marrëveshjen nëse do të qëndrojë ajo.
Kontrata e tij me Teutën ka përfunduar, për 31-vjeçarin ka pasur interesime edhe nga klube të tjera, teksa një nga ato është edhe ekipi i Dinamos pasi e kërkon Ilir Daja.
“Blutë” synojnë të përforcojnë krahun e djathtë të mesfushës dhe mbrojtjes, teksa, me sa duket, Kruja plotëson kërkesat e drejtuesve.
Këto të fundit kanë pasur bisedime me lojtarin shkodran, por futbollisti ende nuk u ka kthyer një përgjigje përfundimtare, teksa ai pritet të vendosë gjithçka në ditët në vijim.
