Tifozët e Manchester United dhe Tottenham janë paralajmëruar të presin çmime marramendëse për pijet alkoolike në Bilbao, për finalen e Europa League.
Mesazhi vjen pasi çmimi i akomodimit në hotel, në qytetin që do të presë finalen javën e ardhshme, është rritur me 900 për qind, pasi “Djajtë e Kuq” dhe “Spursat” konfirmuan biletën e tyre në këtë ndeshje.
Bilbao pret që rreth 80,000 tifozë të zbresin në qytetin bask për këtë ngjarje, ndërsa banorët e qytetit përgatiten për një “pushtim” të cilin nuk e kanë parë kurrë më parë, sipas raportimeve në Spanjë.
Dhe shitësit vendas do të jenë të prirur të shfrytëzojnë këtë skenar dhe të rrisin çmimet për të maksimizuar fitimet e tyre. Megjithatë, delegati i Organizatës së Konsumatorëve dhe Përdoruesve Baskë, Kepa Loizaga, ka kritikuar praktikën që ka bërë që çmimet të rriten 7, 8 dhe madje 9 herë.
Loizaga u bëri thirrje bareve dhe restoranteve që “të mos shesin birrë për 10 euro”, siç ndodhi gjatë finaleve të Kupës Europiane të Regbit në vitin 2018. Për më tepër, ai kritikoi politikën e çmimeve “joproporcionale dhe të tepruara”, të ndjekur nga shumë hotelierë të Bilbaos dhe gjithashtu lëshoi një paralajmërim për qytetin në lidhje me imazhin që po i projekton botës. “Ne tashmë e dimë se pothuajse të gjitha bizneset veprojnë sipas ofertës dhe kërkesës, si fluturimet, ashtu edhe akomodimet”, i tha ai gazetës “El Correo” në Bilbao.
“Nuk ka kufizime për rritje ose uljet e çmimit. Secili e shet produktin e tij sipas dëshirës. Ajo që po i përcjellim pjesës tjetër të botës është shumë negative”. Dy skuadrat e Premier Ligës, e siguruan vendin e tyre në finale pas fitoreve mbresëlënëse kundër Atletik Bilbaos dhe Bodo/Glimt respektivisht dhe do të kërkojnë të shpëtojnë sezonet e tyre në “San Mames” pas paraqitjeve të dobëta në kampionat.
Skuadra e Ange Postekoglusë aktualisht renditet e 17-ta në klasifikimin e Premier Ligës, me lojtarët e Ruben Amorimit vetëm një vend mbi ta, në vendin e 16-të. Megjithatë, rruga për të siguruar një biletë dhe një shtrat për të fjetur natën e 21 majit vazhdon të jetë jashtëzakonisht sfiduese, me tifozët që do të paguajnë mijëra dollarë për udhëtimin dhe akomodimin. Por pavarësisht kostove, tifozët janë të vendosur ta “kolonizojnë” qytetin bask. /Daily Mail
