Barcelona është gati për të zhvilluar atë që mund të jetë ndeshja vendimtare për fitimin e La Ligas. Sonte, në orën 21:30, skuadra e Hansi Flick do të përballet me Espanyolin, në derbin katalanas që luhet në stadiumin “Cornellà-El Prat”, në kuadër të javës së parafundit të kampionatit spanjoll.
Një fitore në këtë përballje do ta shpallte Barcelonën kampione të Spanjës. Klubi blaugrana ka publikuar listën e lojtarëve të grumbulluar, ku bien në sy dy mungesa të rëndësishme:
Ferran Torres është jashtë skuadre pasi iu nënshtrua një ndërhyrjeje urgjente për apendicit. Iñigo Martínez mungon për shkak të pezullimit, pasi ka grumbulluar numrin maksimal të kartonëve të verdhë.
Lajm i mirë për tifozët katalanas është rikthimi i Pablo Torre. Mesfushori ofensiv ka lënë pas problemet në gjurin e majtë, që e mbajtën jashtë për tri ndeshje radhazi, përfshirë edhe gjysmëfinalen e Champions-it kundër Interit. Ai ka marrë dritën jeshile nga stafi mjekësor dhe është rikthyer në listën e trajnerit Flick.
Ndërkohë, Jules Koundé dhe Marc Bernal do të qëndrojnë ende jashtë për shkak të dëmtimeve.
Klubi gjithashtu ka paralajmëruar për rrezikun e pezullimit për disa lojtarë të rëndësishëm: Gavi, Raphinha dhe Fermín janë të gjithë në prag të ndëshkimit me kartonë të verdhë. Një paralajmërim tjetër dhe ata do të humbnin ndeshjen e fundit të sezonit ndaj Villarrealit, të dielën.
Barcelona e ka në dorë fatin e saj dhe sonte mund të mbyllë përfundimisht llogaritë e titullit në një derbi plot emocion dhe tension.
