Trump sapo është takuar me Presidentin e përkohshëm të Sirisë Ahmad al-Sharaa. Është takimi i parë i tillë midis udhëheqësve të dy kombeve në 25 vjet.
Takimi u zhvillua me dyer të mbyllura dhe gazetarët nuk u lejuan të hynin. Shtëpia e Bardhë nuk ka dhënë detaje se kush tjetër ishte në takim dhe as detaje të tjera mbi bisedën.
Shtëpia e Bardhë njoftoi më herët se Trump ka rënë dakord të “përshëndesë” al-Sharaa përpara se udhëheqësi i SHBA-së të përfundojë qëndrimin e tij në Arabinë Saudite dhe të shkojë në Katar, ku Trump do të nderohet me një vizitë shtetërore. Turneu i tij në Lindjen e Mesme do ta çojë atë gjithashtu në Emiratet e Bashkuara Arabe.
Trump deklaroi dje se do të lehtësojë sanksionet ndaj Sirisë: Është pjesë e një mase për të normalizuar marrëdhëniet me qeverinë e re të Sirisë për t’i dhënë vendit “një shans për paqe” dhe se do të vepronte për të rivendosur lidhjet me udhëheqësin e saj të ri, një ish-kryengritës.
Netanyahu i kishte kërkuar Trumpit të mos hiqte sanksionet ndaj Sirisë. Netanyahu e kishte bërë kërkesën gjatë vizitës së tij në Uashington muajin e kaluar, sipas një zyrtari izraelit.
Zyrtari thotë se kërkesa u bë nga shqetësimi se një sulm ndërkufitar i ngjashëm me sulmin e Hamasit më 7 tetor 2023, mund të vinte nga Siria.
Izraeli ka frikë se Presidenti sirian Ahmad al-Sharaa dhe e kaluara e tij islamiste mund të përbëjnë një kërcënim në kufirin e saj verior.
Në fjalimet publike në Ridayh, Trump tha se ishte “shpresa dhe dëshira e tij e zjarrtë” që Arabia Saudite “së shpejti t’i bashkohet Marrëveshjeve të Abrahamit” dhe të njohë Izraelin.
Arabia Saudite prej kohësh ka pohuar se njohja e Izraelit është e lidhur me krijimin e një shteti palestinez përgjatë vijave të kufijve të Izraelit të vitit 1967.
