Emisioni “Stop” në Tv Klan trajton një ngjarje të ndodhur në verën e vitit 2023 në Sarandë në një biznes, që operon prej më shumë 25 vjetësh në fushën e hotelerisë.
“Ka qenë një event në këtë ambient, ku ju jeni duke më intervistuar. Kanë qenë prezentë një sërë personalitetesh dhe aktorësh të shquar të cilët ishin pjesë e këtij aktiviteti. Rreth orën 17:45 ka zbarkuar ka zbarkuar një ‘bandë’. Kanë zbarkuar disa persona pa uniformë, pa shenja dalluese të Policisë së Shtetit. E kanë pranuar edhe vetë ata që kanë qenë pa uniformë dhe pa shenja dalluese dhe kanë mbyllur aktivitetin. Me paturpësi shefi i komisariatit thotë se ka shkuar për të mbyllur aktivitetin”, tha avokati Arben Llangozi.
Në këtë biznes po zhvillohej një aktivitet për Butrintin dhe ishin të ftuar personalitete të televizionit, artit dhe politikës.
Rreth orës 23:00 të mbrëmjes në biznes zbarkojnë forcat e Policisë Sarandë, pa uniforma apo shenja identifikuese të Policisë së Shtetit.
“Ka qenë një aktivitet në lidhje me Butrintin. Ka qenë të ftuar shumë personalitete si nga Shqipëria, si nga diaspora dhe si nga Maqedonia, Kosova, si të politikës, të artit dhe të kulturës. Mund të përmendim aktorë të mëdhenj si Timo Flloko, apo regjisorë të mëdhenj që ka Shqipëria si Vera Grabocka dhe shumë të tjerë. Po atë ditë vjen një person, u habita sepse vjen direkt dhe shkon tek muzika për ta bllokuar muzikën. Mendova se ishin ‘bodyguard’, por kur e pashë me radio mbrapa dhe u ngit lart, fiku muzikën me forcë mund të them madje, sepse edhe Dj u habit. Ne kemi qenë edhe brenda rregullave me leje të posaçme me leje aktiviteti pas orës 00:00, ku në fakt ora ishte 22:00”, tha për mikrofonin e emisionit “Stop” qytetari.
Ata mbyllin muzikën dhe shoqërojnë pronarin e lokalit dhe disa persona të tjerë edhe pse nuk kishte asnjë ankesë, apo denoncim për zhurma.
“Nuk ka pasur fare asnjë denoncim, nuk ka pasur fare asnjë ndotje akustike sepse nuk ka asnjë lloj procedimi edhe nga policia edhe nga prokuroria për një lloj ndotje. Nuk ka një konstatim, nga bashkia apo mjedisi. Aq më tepër që ky subjekt është i licencuar dhe ka një akustikë të mirë organizuar dhe nuk ka zhurma në ambientet e jashtme. Por, policia pa asnjë ankesa ka zbarkuar, ka shoqëruar pronarin e këtij subjekti dhe e ka dhunuar në furgon”, shton më tej avokati.
“Vetëm kur shikoj furgonin e policisë që merr pronarin, nuk pashë asnjë lloj gjëje që të komunikohej dhe që të flitej. Erdhën direkt dhe e morën në furgon, kjo më habiti sepse erdhi grup i gatshëm. Të ftuarit ishin të gjithë të habitur se çfarë ndodhi. Sepse ishin të gjithë personalitete të muzikës, artit, por edhe nga bashkia. Festa u prish vërtet”, shton më tej gjithashtu qytetari.
Avokati Arben Llangozi shpjegon, se pronarët e lokalitbënë kallëzim ndaj policisë për këtë aksion arbitrar. Meqë u përball me kallëzimin, policia u kundërpërgjigj duke bërë dhe ajo një kallëzim për kundërshtim të forcave të policisë për pronarin dhe vëllain e tij. Por ky i fundit nuk ishte fare prezent atë natë.
“Procedimi që ata kanë nisur e kanë nisur si kundërshtimi i forcave të policisë të rendit. Ndërkohë që forca rendi nuk kishte, ishin disa banditë. Madje disa efektivë të policisë kanë qenë edhe me pantallona të shkurtra. Policia e Shtetit ka kryer vetë veprime hetimore. Pra vetë viktimë edhe vetë oficer. Nuk ka njoftuar policinë, nuk kanë kryer veprime, sepse në raste të tilla veprimet i kryer oficeri i prokurorisë, sepse policia është viktimë”, sqaron avokati.
Por, sot edhe pse kanë kaluar gati një vit e gjysmë nga ky kallëzim, ende prokuroria Esmeralda Basho nuk ka vërtetuar që pronari i këtij aktiviteti ka kundërshtuar dhe ka dhunuar policinë e Sarandës.
“Prokuroia Basho ka nxjerrë një sërë veprimesh hetimore të pavlefshme, ka bërë ballafaqime, ku në përfundim ka marrë dy vëllezër të pandehur. Ku vetë “viktimat” e atij procesi kanë deklaruar se njëri nga vëllezërit nuk ka qenë farë në konflikt. Kjo për të rënduar pozitën dhe për të treguar se ajo është gangstere dhe jo prokurore dhe që ajo bën atë që mendon. Por, ajo duhet të bëjë atë që mendon komform ligjeve dhe provave dhe jo sipas bindjes së saj dhe mendimit të saj personal mbi personat e ndryshëm. Kemi kërkuar ndjekjen penale për punonjësit e policisë për veprime arbitrare, shpërdorim të detyrës dhe falsifikim të dokumenteve, por prokuroria Basho ka mbuluar ‘diellin me shoshë’ ka regjistruar një procedim penal të çalë, vetëm për një nga kërkimet tona, duke mbuluar hapur forcat e rendit, të cilat siç e kam theksuar nuk janë forca rendi, por banditë për të vendosur gjoba në qytetin e Sarandës. Unë me bindje them që kjo ka favorizuar shefat e djemve të xhaxhait të saj. Djemtë e xhaxhait të saj janë punonjës policie”, përfundoi avokati Llangozi./ tv klan
