FSHF do të hapë aplikim për shitjen e biletave në ndeshjen me Serbinë.
Federata e justifikon këtë model me “kërkesën e lartë” dhe nevojën për menaxhim.
Në teori, kjo mund të duket si një mënyrë për të garantuar barazi mes tifozëve, por në praktikë, krijon një ndjesi konfuzioni dhe mungesë kontrolli nga publiku teksa ngrihen pikëpyetje nëse ky “short” të jetë realisht i rastësishëm apo është një filtër i padukshëm për përzgjedhje të favorizuara.
Ndërkohë gjatë kësaj kohe, federata përgënjeshtron lajmin e një medie online me bazë në Zvicër ku tregohet se nuk do të shiten bileta për shqiptarët e Kosovës në ndeshjen me Serbinë.
Të gjithë shqiptarët deklaron FSHF, do të kenë mundësinë për të qenë në “Arenën Kombëtare” më 7 qershor.
Postimi i FSHF-së:
“Deklaratë për media e FSHF në lidhje me procesin e shitjes së biletave për ndeshjen Shqipëri-Serbi
Federata e Futbollit dëshiron të përgënjeshtrojë kategorikisht një lajm të shpërndarë së fundmi nga një media online me bazë në Zvicër, që pretendon në mënyrë të rreme dhe pa asnjë bazë faktike se tifozët shqiptarë nga Kosova janë të përjashtuar nga ndeshja Shqipëri–Serbi, që luhet më 7 qershor në stadiumin “Arena Kombëtare”.
Ky informacion është krejtësisht i pavërtetë dhe abuziv. FSHF i ka dërguar një komunikim zyrtar medias në fjalë dhe është në pritje të një përgjigjeje formale.
Sqarojmë se procesi i shitjes së biletave për ndeshjen Shqipëri–Serbi do të kryhet përmes një sistemi transparent dhe të hapur për të gjithë tifozët, pa asnjë diskriminim apo përjashtim.
Aplikimi për bileta do të nisë më 15 maj, përmes një formulari elektronik që do të publikohet në faqen zyrtare të FSHF-së. Afati i aplikimit do të zgjasë dy javë dhe në fund të muajit maj do të zhvillohet një short kompjuterik, për të përzgjedhur tifozët që do të kenë të drejtën të blejnë biletat. Të përzgjedhurit do të njoftohen me email.
FSHF mbetet e përkushtuar ndaj një organizimi dinjitoz të ndeshjes dhe fton të gjithë tifozët shqiptarë, kudo që ndodhen, të ndjekin me besim komunikimet zyrtare dhe të mos bien pre e lajmeve të rreme”.
