Meksika ka ngritur një padi kundër Google pasi kompania ndryshoi emrin e Gjirit të Meksikës në “Gjiri i Amerikës” për përdoruesit e Google Maps në SHBA, raporton The Guardian.
“Padia është ngritur tashmë“, tha presidentja meksikane Claudia Sheinbaum në një konferencë për shtyp të premten në mëngjes.
Ndërkohë, të enjten, republikanët miratuan legjislacionin në Dhomën e Përfaqësuesve mbi propozimin e Presidentit të SHBA-së Donald Trump për të riemëruar Gjirin e Meksikës në “Gjiri i Amerikës”, të cilin demokratët e kundërshtuan.
Megjithatë, projektligji nuk ka gjasa të sigurojë mbështetjen e nevojshme demokrate për të kaluar në Senat, ndërsa edhe nëse do të miratohej, vendet e tjera në botë nuk kanë asnjë detyrim ta riemërtojnë Gjirin e Meksikës në Gjirin e Amerikës.
Qeveria meksikane, nga ana e saj, argumenton se urdhri ekzekutiv i Donald Trump për këtë çështje vlen vetëm për pjesën e shelfit kontinental që i përket Shteteve të Bashkuara.
“E tëra çfarë duam është që dekreti i lëshuar nga qeveria amerikane të respektohet… Ai e quan vetëm një pjesë të shelfit kontinental të SHBA-së Gjirin e Amerikës, jo të gjithë gjirin, sepse nuk do të kishte autoritetin për të riemërtuar të gjithë gjirin”, tha presidentja meksikane.
Në përgjigje të Trump, Sheinbaum me humor sugjeroi që Shtetet e Bashkuara të quheshin “América Mexicana” – Amerika Meksikane, duke treguar një hartë që daton para vitit 1848, kur një e treta e vendit të saj ishte e pushtuar nga Shtetet e Bashkuara.
