Gjykata e Posaçme e Apelit ka prishur vendimin e vitit 2019 të ish-Gjykatës së Apelit për Krime të Rënda për të ashtuquajturin “grupin e zjarrit” në Lazarat, të cilët ishin dënuar për ngjarjen e vitit 2014.
Apeli i GJKKO ka vendosur që të ul dënimet, ku nga 51 vite burgim në total për grupin, dënimi ka shkuar në 31 vite burgim në total, më konkretisht janë dënuar me nga:
10 vite burg Arbjon Aliko (ishte dënuar me 13 vite burg)
8 vite burg Gurgaz Skënderi (ishte dënuar me 11 vite burg)
8 vite Enrik Skënderi (ishte dënuar me 10 vite burg)
4.9 vite Alfred Proko ( ishte dënuar me 10 vite burg në mungesë)
Apeli i Posaçëm ka prishur dhe vendimin e ish-Gjykatës së Shkallës së Parë për Krime të Rënda për shtetasin Beqo Brahimi që ishte dënuar me 8 vite burg për “Prodhimi dhe shitja e narkotikëve” dhe “Shkatërrimi i pronës me zjarr” duke vendosur pushimin e çështjes ndaj tij për këto akuza, për shkak se me vendim gjyqësor të formës së prerë është dënuar për të njëjtat vepra penale.
Pesë të pandehurit ishin dënuar me 52 vite burgim në total nga Gjykata e Krimeve të Rënda, një dënim më i lehtë se ai i kërkuar nga prokuroria, që ishte 57 vite. Ky vendim ishte lënë në fuqi edhe nga Gjykata e Apelit, por Gjykata e Lartë në dhjetor të vitit të kaluar vendosi ta rikthente për rigjykim në Gjykatën e Posaçme.
Ata janë pjesë e grupit të njohur si “Gate Mahmutaj”, ndërkohë që procesi ndaj tyre ka vazhduar në mënyrë të pavarur nga ai i kreut të grupit, Gate Mahmutajt.
Ky i fundit u dënua me 17 vite burg për kundërshtimin e forcave të policisë në operacionin e vitit 2014, gjatë të cilit ata qëlluan me armë, përfshirë armë të artilerisë së rëndë. Në atë ngjarje mbeti i vrarë efektivi i policisë Ibrahim Basha.
