Departamenti i Policisë së Louisville ka publikuar momentet e ankthit që përjetoi një shofer në SHBA, kur kamioni i tij mbeti i bllokuar pas një aksidenti trafiku në një urë.
Aksidenti ndodhi të dielën, kur për arsye ende të panjohura shoferi i kamionit humbi kontrollin duke bërë që kabina të “varej” në boshllëk.
Në telefonatën 18-minutëshe me policinë, shoferi dëgjohet duke thënë: “A mund të më ndihmojë dikush? Jam gati të bie nga ura. Jam varur në urë. Nuk dua të vdes.”
Operatorja e policisë, Martina Vonner, u përpoq ta qetësonte shoferin, duke i thënë: “Do të vijnë të të nxjerrin jashtë, do të jesh mirë”.
“A mund ta bëjnë? Nuk e di këtë?” vazhdoi të thoshtë shoferi i frikësuar, me policen që përpiqej t’i jepte kurajë: E di që mund të të shpëtojnë, e kanë bërë edhe më parë.
“Nëse nuk mbijetoj, a mund ta telefonosh familjen time”, ishte kërkesa tjetër dramatike e shoferit.
Departamenti lokal i zjarrfikësve nxitoi në vendngjarje, dhe zjarrfikësit fillimisht stabilizuan kamionin me zinxhirë, përpara se njëri nga shpëtuesit, i lidhur me një litar, t’i afrohej kabinës dhe të shpëtonte shoferin e tmerruar.
Duke folur për operacionin e suksesshëm 30-minutësh, shefi i zjarrfikësve vendas tha se ishte “jashtëzakonisht i rrezikshëm”, duke pranuar se kishte përjetuar një situatë të ngjashme vetëm një herë më parë në karrierën e tij 24-vjeçare.
