Kryekomisioneri Ilirjan Celibashi ka njoftuar sot të gjitha problematikat e hasura deri tani me procesin e shpërndarjes së zarfeve me votat e diasporës dhe shqetësimet e opozitës.
Në një konferencë për mediat kreu i KQZ pranoi se 21 mijë zarfe ende nuk kanë shkuar në adresën e zgjedhësve nga kompania postare.
“Janë zarfe që nuk janë shpërndarë akoma, prej tyre 11 mijë janë për shkak të problematikave të lidhura me adresën. Pjesa tjetër lidhet me ata votues që janë njoftuar nga kompania, por votuesi ende nuk ka shkuar”.
Celibashi pranoi problematikën me shpërndarjen e zarfeve me fletët e votimit në Greqi, ku ka pasur edhe shumë ankesa nga partitë. Për këtë ai sugjeroi që zgjedhësit shqiptarë të shkonin vetë pranë zyrave të DHL-së dhe të interesoheshin për zarfin dhe ta dërgonin atë, pasi afati mbaronte në datën 8 maj.
“Ka vonesa me dërgesat postare nga DHL. Kemi një kontratë, vendoset në fund nëse u zbatua. Problematikat janë individuale. Falënderojmë partitë, por njohim denoncime nga zgjedhësit. Deri në momentin që flasim janë 156 ankesa në KQZ, nga këto janë 90 raportime që zarfi i DHL është lënë në hyrjen e banesës apo kutinë postar. Janë 21 ankesa që DHL nuk pranon të vijë dhe të marrë zarfin mbrapsht. Janë 9 zgjedhës që kanë raportuar që nuk u ka mbërritur fleta e votimit. Katër votues kanë paraqitur ankesë që nuk kanë marrë mesazh nga DHL. Janë 3 zgjedhës që kanë raportuar dhe 29 të tjerë kanë raportuar problematika të ndryshme”, tha Celibashi.
