Gjykata e Lezhës ka caktuar ditën e sotme masën e sigurisë “arrest me burg” për 28-vjeçarin Klevis Ndreca dhe 26-vjeçarin Daniel Gjeloshi, të përfshirë në përplasjen me armë në Laç mesditën e të shtunës, ku mbeti dhe një viktimë.
Klevis Ndreca u paraqit në seancë para togave të zeza për t’u njohur me masën e sigurisë, ndërsa Danjel Gjeloshi, i cili po merr mjekim në spital, pasi mbeti i plagosur, u përfaqësua nga avokati i tij mbrojtës.
Pasi dëgjoi palët, gjyqtari Lirim Buluca e caktoi të ligjshëm arrestimin e dy të rinjve dhe vendosi ndaj tyre masën e sigurisë arrest në burg për veprën penale të vrasjes dhe armëmbajtjes pa leje.
Nga hetimet e deritanishme ka rezultuar se Klevis Ndreca 28 vjeç ka qenë në makinë me Amarildo Ndoj 26 vjeç, ndërsa Daniel Gjeloshi 26 vjeç ka qenë në makinë me Liridon Ismailaj 26 vjeç dhe Gerald Bitrin 24 vjeç.
Të rinjtë janë konfliktuar verbalisht për shkak se gjatë lëvizjes me makinë kanë kapur pasqyrat e njëri-tjetrit dhe më pas e kanë lënë që të sqarohen pak më tutje në rrugën, ku ndodhi edhe ngjarja dhe konflikti degradoi në përdorimin e armëve.
Sapo kanë ndaluar dhe kanë zbritur të gjithë nga makinat duke u afruar tek njëri-tjetri, Ndreca ka nisur të qëllojë me armë drejt tre të rinjve Daniel Gjeloshi, Liridon Ismaili dhe Gerald Bitri, duke i lënë të plagosur.
I plagosur mbeti edhe shoku i tij, Amarildo Ndoji, si dhe një grua, Angjelina Gjezaj, një shitëse ammbulante, e cila ndodhej në trotuar duke shitur qirinj.
Me armë zjarri pistoletë është kundërpërgjigjur edhe Daniel Gjeloshi por nuk ka plagosur asnjë person. Arma që u gjet pak metra larg vendit të ngjarjes i përket 26-vjeçarit Daniel Gjeloshi.
Fatkeqësisht, Gerald Bitrti nuk arriti dot t’u mbijetonte plagëve të marra dhe ndërroi jetë në spital.
