Vllaznia – Dinamo City është ndeshja e parë e fazës “Final 4” që do të luhet të dielën, më 4 maj, në orën 20:00, në stadiumin “Arena Kombëtare”. Një përballje që pritet të jetë tepër e luftuar, pasi skuadra fituese siguron një vend në finalen e madhe të edicionit futbollistik 2024/2025.
Gjatë këtij sezoni, Vllaznia dhe Dinamo janë përballur plot 6 herë, katër herë në kampionat dhe dy herë në gjysmëfinalet e Kupës së Shqipërisë. Shkodranët kanë arritur vetëm një fitore, dy ndeshje janë mbyllur në barazim, ndërsa Dinamo ka fituar tri herë, duke krijuar një bilanc pozitiv ndaj rivalit të saj.
Ndeshja e së dielës nuk luhet më për pikë, por për një vend në finalen e madhe, duke e bërë sfidën akoma më vendimtare. Të dyja skuadrat kanë mbërritur me meritë në këtë fazë pas një sezoni të gjatë me 36 javë plot emocione, përpjekje dhe shumë sakrifica.
Të gjithë futbolldashësit mund të blejnë biletat për të ndjekur nga afër këtë ndeshje emocionuese në ebileta.al ose fizikisht pranë pikës së shitjes në stadiumin “Arena Kombëtare”.
