Policia Kufitare e Portit të Durrësit ka goditur një rast të tentativës për trafikim të veprave të artit. Më konkretisht, janë sekuestruar 10 piktura me vlerë rreth 25 000 euro, të cilat do të trafikoheshin përmes portit të Durrësit.
Si rezultat, është arrestuar shoferi i furgonit ku u gjetën pikturat, shtetasi Kasem Qato, 37 vjeç, banues në Elbasan. Gjithashtu, janë shpallur në kërkim dhe shtetasit Q. H., 25 vjeç, banues në Fier dhe G. N., 53 vjeç, banues në Durrës, pasi nga hetimet dyshohen si bashkëpunëtorë të Kasem Qatos, për trafikimin e pikturave.
“Në vijim të punës së bazuar në analizën e riskut, të kryer nga Policia Kufitare e PKK Port Durrës, në hyrje/dalje të vendit, me qëllim parandalimin dhe goditjen e krimeve në kufi, në dalje të Shqipërisë, është kaluar në vijë të dytë, për kontroll të detajuar, furgoni me drejtues shtetasin Kasem Qato. Nga kontrollet në këtë mjet, janë gjetur 10 vepra arti (piktura), të padeklaruara, për të cilat ky shtetas nuk dispononte asnjë dokument që vërtetonte origjinën e tyre apo pronësinë mbi to.” – thuhet në njoftimin e Policisë.
Materialet procedurale i kanë kaluar Prokurorisë së Durrësit për veprime të mëtejshme, për veprën penale “Trafikimi i veprave të artit dhe kulturës”, kryer në bashkëpunim.
