Një deputet kenian është vrarë me armë zjarri në një sulm të dyshuar si atentat në Nairobi, kryeqytetin e Kenias.
Charles Ong’ondo Uere, anëtar i opozitës dhe përfaqësues i zonës Kasipul, u qëllua nga afër nga një person i cili zbriti nga një motor që e kishte ndjekur automjetin e tij.
Policia tha se sulmi ishte i mirëplanifikuar dhe i qëllimshëm. Deputeti ishte shprehur më parë për kërcënime ndaj jetës së tij, duke përmendur një komplot nga “njerëz të paguar” për ta vrarë, lidhur me tensione politike lokale.
Pavarësisht pranisë së policisë dhe kamerave të sigurisë në zonën ku ndodhi atentati – afër Ngong Road – vrasësit arritën të arratiseshin. Shoferi dhe truproja e tij nuk u lënduan dhe arritën ta çonin në spital, por mjekët e shpallën të vdekur deputetin me të mbërritur atje. Presidenti Uilliam Ruto ka urdhëruar një hetim të plotë, ndërsa politikanë të shumtë kanë dënuar vrasjen dhe kanë kërkuar drejtësi. Ish-kryeministri dhe lideri i opozitës, Raila Odinga, e përshkroi vrasjen si një atentat “të ftohtë dhe pa mëshirë”.
Uere ishte në mandatin e tij të dytë si deputet i partisë Orange Democratic Movement dhe mbështeste qeverinë e gjerë të formuar pas një marrëveshjeje mes opozitës dhe presidentit Ruto.
