Profesori dhe psikoterapisti Skerdi Zahaj ka reaguar në lidhje me emisionin “Fiks Fare”, i cili raportoi mbrëmjen e djeshme se kandidati i PD në Shkodër, Gentian Ndoj ka kartelë të hapur në spital për probleme deluzionale.
Përmes një postimi në rrjetet sociale, Zahaj shkruan se si psikolog klinik dhe psikoterapist që punon çdo ditë me njerëz që përballen me ankth, depresion, çrregullime të humorit apo trauma të thella, të kërkosh ndihmë për shëndetin tënd mendor nuk është turp, por guxim, vetëdije dhe akt force.
Ai thotë se përdorimi i historive psikiatrike për të diskredituar dikë është jo vetëm i pandershëm, por thellësisht i rrezikshëm. Sipas Skerdi Zahajt, nëse duam një shoqëri më të drejtë, më njerëzore dhe më të ndershme, atëherë duhet të ndalojmë ta përdorim shëndetin mendor si armë turpi.
Reagimi i plotë:
Lexova me shqetësim artikullin e Top Channel që publikon të dhëna nga historia psikiatrike e një kandidati politik, duke e paraqitur këtë si mangësi, si dobësi, si diçka për t’u turpëruar.
Si psikolog klinik dhe psikoterapist që punoj çdo ditë me njerëz që përballen me ankth, depresion, çrregullime të humorit apo trauma të thella — dua ta them qartë: të kesh kërkuar ndihmë për shëndetin tënd mendor nuk është turp. Është guxim. Është vetëdije. Është një akt force.
Përdorimi i historive psikiatrike për të diskredituar dikë është jo vetëm i pandershëm, por thellësisht i rrezikshëm. Ai i jep shoqërisë një mesazh të heshtur, por të fuqishëm: “Nëse ke vuajtur ndonjëherë psikologjikisht, nuk ke vend në jetën publike.” Kjo është një padrejtësi për çdo njeri që po lufton në heshtje.
Shëndeti mendor nuk na bën më pak të vlefshëm. Nuk na bën më pak qytetarë. Dhe sigurisht, nuk na bën më pak njerëzorë. E kundërta është e vërtetë: ata që kanë kaluar vështirësi mendore, e kuptojnë më mirë se shumica peshën e dhimbjes, dhe shpesh kanë më shumë ndjeshmëri, reflektim dhe përulësi.
Nëse duam një shoqëri më të drejtë, më njerëzore dhe më të ndershme, atëherë duhet të ndalojmë ta përdorim shëndetin mendor si armë turpi. Është koha të flasim ndryshe.
Është koha të dëgjojmë më shumë. Është koha të kemi më shumë kujdes.
