Kreu i koalicionit ‘Nisma Shqipëria Bëhet’ Adriatik Lapaj, i është përgjigjur Ministrit të Shtetit, njëkohësisht drejtuesi politik i PS-së për Diasporën, Taulant Balla në lidhje me zgjedhjet e 11 Majit.
Lapaj tha gjatë një takimi elektoral në Kamëz, se Ballën do ta shohin kur të garojë në momentin që ai nuk do të jetë më në pushtet dhe mos ketë ndikimin e parave të korrupsionit.
“Do të ta shohim sa të vlen lëkura të garosh pa qenë në pushtet. Të garosh pa pasur Policinë! Të garosh pa pasur lekët e korrupsionit! Do ta shohim, Taulant, sa u vlen lëkura! Erdhi dhe 10 ditë! Forca! Shikoje, Taulant!”, tha Lapaj gjatë një takimi elektoral në Kamëz.
Kujtojmë që Lapaj dhe Balla janë përfshirë në një debat me s tyre dy ditë më parë, pasi socialisti e krahasoi kreun e ‘Shqipëria Bëhet’ me Lulzim Bashën.
Në një video të publikuar nga Balla, ku ironizohej Lapaj për një gafë matematikore, ministri shkruan:
“Eh mor buf, si dy pika ujë të ngjajnë djemtë! Luli në shumëzim, Tiku në mbledhje, fiks si babi me tavanin, dividentin, energjinë elektrike etj. Adriatik Lapaj, e mirë, zgjidhe këtë pa ndihmën e bufit,”- shkruan Balla.
Videoja është parë nga kandidati për deputet, i cili nuk ka ngurruar ta komentojë. Lapaj lë të kuptohet se Balla e ka prerë videon në mënyrë të qëllimshme për ta publikuar dhe për t’i prishur imazhin. Ai e fton që ta publikojë videon të paprerë.
