Adriatik Lapaj, drejtues i koalicionit “Nisma Shqipëria Bëhet”, në një takim me banorët e Kamzës ku prezantoi kandidatët, tha se duhet shembur ky sistem, për të bërë të mundur njëherë e mirë ndarjen përfundimtare me të shkuarën.
Lapaj thekson se Kamza është shembulli i keqshpërdorimit të politikës, pasi i kanë lënë qytetarët pa legalizime, pa trotuare, pa lulishte, pa shkolla, etj. Ai u bëri thirrje qytetarëve që ta ndëshkojnë PS-në me votë.
“Politikanët shkojnë nga qarku në qark dhe gënjejnë. Këto nuk janë zgjedhje, janë referendum. Ta shembim këtë sistem, të bëjmë njëherë e përfundimisht ndarjen e madhe. Të ndërtojmë një republikë për qytetarët. Mendojeni punën e zgjedhjeve me shumë maturi.
12 maji do të ndajë historinë e Shqipërisë. Kamza është shembulli i keqshpërdorimit të politikës, ju lanë pa legalizime, pa trotuare, pa lulishte, pa shkolla, etj. Prandaj ndëshkojeni me votë.
Ju kërkoj ju me përulësinë më të madhe, bëni ndryshimin. Na mbështetni, ta çajmë sistemin. Ne nuk merremi me fyerjet e të tjerëve, por ama nuk do t’i lëmë të na shkelin. Ne nuk e dimë a do të bëjmë 71 mandate, por ama do të shohim sa u vlen lëkura me deputetët tanë. Forca bashkimi i madh, forca Kamza!”
Ky vend ka shpresë dhe e dimë që do t’ia dalim. Do të luftojmë pa kthim. Mirënjohje të pakufishme”– u shpreh Lapaj.
