Partizani është shpallur kampion për grupmoshën U-17. “Demat” barazuan në ndeshjen e fundit ndaj Tiranës me rezultatin 3-3, që mjaftonte për të fituar trofeun.
Një finale dramatike në Kompleksin Sportiv “Skënder Halili” ku Partizanit i bënte punë edhe barazimi, duke qenë 1 pikë para në renditje.
Dhe pse Partizani gjeti avantazhin e dyfishtë me Himallarin dhe Hykën pas 13 minutave, Tirana ia doli të reagojë duke barazuar. Gjini fillimisht dhe Bami më pas nga penalltia, rikthyen shpresat te bardheblutë.
Pjesa e parë u mbyll me 5 gola, pasi të kuqtë gjetën sërish avantazhin. Elson Himallari plotësoi dopietën personale.
Barazimi i Tiranës së Endrit Ohrit erdhi në minutën e 84-t ku Klejdi Gjini realizoi golin e dytë personal.
Bardheblutë provuan deri në fund për përmbysjen e madhe, por të kuqtë e trajnerit Aldo Duro u mbrojtën mirë. Ky është sezoni i dytë radhazi për Partizanin U-17, që shpallet kampion.
