Tirana do të luajë gjithë sezonin ditën e sotme në sfidën me Dinamon. Përballje kjo që do të zhvillohet në orën 15:30 në “Egnatia Arena” dhe që është sfida e fundit e këtij sezoni në Superiore.
Bardheblutë aktualisht janë në vendin e 9-të në klasifikim, teksa kanë 36 pikë, po aq edhe Laçi që ndodhet i fundit. Tashmë kryeqytetasit janë të dënuar vetëm për fitore për të shpresuar te ndodhë mrekullia, ndërsa çdo rezultat tjetër ndaj Dinamos përveç 3 pikëve do t’i çonte ata në Kategorinë e Parë.
Kështu me fitoren e mundshme të Tiranës, shpresat do të rriteshin për bardheblutë për të siguruar “Play-Out” dhe për të luajtur një ndeshje shtesë për qëndrimin në Superiore, pasi për shkak edhe të pikëve të rivalëve, kryeqytetasit nuk mund të shpëtojnë direkt.
Fakti që Skënderbeu dhe Bylisi do të sfidohen mes tyre në Korçë dhe çfarëdo rezultati të kete mes tyre, Tirana do të ngjitej në vendin e 8-të. Fatmirësisht bardheblutë kanë bilanc më të mirë ndaj Laçit, Skënderbeut dhe Bylisit në duelet direkte mes tyre.
Tirana në sezonin më të errët në histori
Fakt është që bardheblutë e këtij sezoni janë edhe më keq se në kampionatin 2016-2017 kur ranë nga kategoria. Atë vit, skuadra kishte grumbulluar 38 pikë në 35 takime dhe e mbylli javën e 36-të me 39 pikë, pas barazimit në Shkodër.
Tirana e këtij sezoni ka dy pikë më pak se atë vit, 36, ndërsa është shumë keq për sa u përket komponentëve të tjerë. Janë 44 gola të pësuar kundrejt 32 në atë vit.
Tetë fitore, kundrejt gjashtë dhe 14 barazime kundrejt 18 të këtij viti. Për të mos folur se në atë kampionat janë shënuar 29 gola, ndërsa këtë vit janë 41 gola dhe bardheblutë kanë 2 pikë më pak. Për çudi, edhe atë vit, Teuta, Laçi ishin dy skuadra që luftonin për mbijetesën.
