Harry Kane ka sot rastin për të siguruar titullin e parë kampion në karrierë. Në fakt, do të ishte titulli i 34-t kampion për Bayern Munich në histori, por i pari për bomberin anglez, i “malkuar” në këtë drejtim deri tani.
Bavarezët ndodhen +8 pikë përpara Bayer Leverkusenit, me vetëm 4 javë të mbetura. Sot, në orën 15:30, të dyja skuadrat do të zbresin në fushë. Skuadra e Kompany do të përballet me Mainz, ndërsa ajo e Xabi Alonso me Augsburg.
Në rast fitoreje të titullit, ky do të ishte trofeu i parë në karrierë për Harry Kane, duke i dhënë fund njëherë e mirë etiketës së bezdisshme të “humbësit”, që e ka shoqëruar gjatë gjithë karrierës.
“Do të ishte fantastike! Ndoshta do t’i ndalonte disa nga ata që flasin për faktin se nuk kam fituar ende një titull, – tha vetë sulmuesi anglez në një intervistë për “Absolut Fußball”. – Nëse ia dalim, do të ketë festë të madhe. Megjithatë, më pas vëmendja do të përqendrohet tek objektivi tjetër. Në futboll gjithmonë ka diçka më shumë për të arritur. Për momentin, fokusi ynë është vetëm te kampionati”.
Kane foli gjithashtu për zhgënjimin e eliminimit nga Champions League, në çerekfinale kundër Interit: “Një eliminim i tillë lë gjithmonë shije të hidhur. Edhe pse dhamë maksimumin, nuk arritëm të shkonim në finalen që do të luhej në stadiumin tonë. E di që tifozët do të na mbështesin gjithmonë, jam i bindur që do të rikthehemi edhe më të fortë në Champions League”.
