Seanca për shpifje në Gjykatën e Posaçme midis deputetes demokrate Albana Vokshi dhe biznesmenes Vilma Nushi është shtyrë sërish. Shkak për shtyrjen e seancës u bë mungesa e prokurorit Elvin Gogaj, ndërsa seanca e radhës u caktua më 6 maj.
Vilma Nushi, së bashku me Shoqërinë 3P Life Logistic, e cila ka fituar koncesionin për Check Up, ka paditur Albana Vokshin për shpifje, veprim penal i parashikuar nga Neni 120 i Kodit Penal.
Kjo padi ka nisur pas deklaratave të Vokshit, e cila akuzoi se vlera e projektit të koncesionit për Check Up ishte 130 milionë euro, ndërsa pala paditëse e kundërshton këtë vlerë, duke thënë se vlera reale është 63 milionë euro për 10 vitet e projektit.
Albana Vokshi, në një deklaratë të shkurtër për median pas shtyrjes së seancës, tha se qëllimi i shtyres së seancës është i qëllimshëm.
‘Seanca u shty pasi mungonte prokurori, s’kishte dërguar njoftim për mungesën e tij. Logjika të çon se është e qëllimshme, ishin ata vetë që e investuan gjykatën për të më bërë mua të hesht para padrejtësive, abuzimeve dhe korrupsionit marramëndës me abuzimet e chek upp. E kanë caktuar seancën e radhës më 6 maj, në kohë fushate duan të na heqin edhe kohën e fushatës’, u shpreh Vokshi.
