Një tjetër sulm nga Uashingtoni ndaj palës ukrainase të mërkurën, në një kohë kur Rusia pothuajse po kalon pa kritika.
Presidenti ukrainas Volodymyr Zelensky po ndjek një drejtim të gabuar në bisedimet për paqe, deklaroi të mërkurën zëdhënësja e Shtëpisë së Bardhë, Karoline Leavitt.
Presidenti amerikan Donald Trump është i irrituar me ritmin e bisedimeve për përfundimin e luftës në Ukrainë dhe mendon se Zelensky po ndjek një rrugë të gabuar në negociata, theksoi ajo.
“Presidenti është i zemëruar. Durimi i tij po shteron. Ai dëshiron të bëjë atë që është e drejtë për botën,” tha Leavitt për gazetarët në Shtëpinë e Bardhë. “Ai dëshiron të shohë paqe. Dëshiron që vrasjet të ndalen. Por nevojitet që të dyja palët në këtë luftë të jenë të gatshme për ta arritur këtë.”
Ajo shtoi se, fatkeqësisht, presidenti Zelensky duket se po lëviz në drejtimin e gabuar.
Leavitt gjithashtu sqaroi se nuk do të ketë ulje të njëanshme të tarifave kundër Kinës.
