Marina japoneze ka prezantuar një top elektromagnetik që montohet në anije i ndërtuar për të rrëzuar raketat hipersonike hyrëse të Kinës.
Sistemi i madh dhe futuristik i armëve u fotografua javën e kaluar duke iu nënshtruar fazave të avancuara të testimeve në kuvertën e fluturimeve të anijes eksperimentale luftarake JS Asuka.
Tokio është përqendruar me intensitet në fushën e zhvillimit të armëve të gjeneratës së ardhshme, ndërsa kërcënimet nga Kina, Rusia dhe Koreja e Veriut rriten në rajonin Indo-Paqësor.
Topi elektromagnetik nuk ka nevojë për eksplozivë apo shtytës, por përdor energjinë elektromagnetike për të lëshuar predha me shpejtësi supersonike, duke ofruar një përgjigje të shpejtë dhe me kosto efektive ndaj kërcënimeve të mundshme nga raketat me lëvizje të shpejtë.
Ai qëllon me shpejtësi më të lartë sesa armët tradicionale, me municionin që udhëton me 2500 metra për sekondë (m/s), në krahasim me armët klasike të tankeve, të cilat lëshojnë predha me një shpejtësi prej rreth 1750 m/s.
Forcat Detare Vetëmbrojtëse të Japonisë (JMSDF) thanë se nënadmirali Omachi Katsushi, komandant i Flotës së Vetëmbrojtjes, kishte vizituar anijen Asuka “për të vëzhguar gjendjen më të fundit të topit elektromagnetik, i cili është në zhvillim nga Agjencia e Blerjeve, Teknologjisë dhe Logjistikës”.
Zyrtarët deklaruan se kjo armë do të forcojë mbrojtjen raketore detare dhe ka potencialin të angazhojë objektiva ajrore, detare dhe tokësore me një saktësi më të lartë sesa municionet konvencionale.
Kërkimet për këtë sistem të ri armësh nisën në vitin 2016 dhe ajo realizoi testimin e saj të parë të qitjes nga bordi në tetor të vitit 2023.
Topi elektromagnetik “mbështet zhvillimin e gatishmërisë së ardhshme luftarake dhe të mbrojtjes kombëtare të Japonisë”, tha JMSDF javën e shkuar.
Japonia kishte nevojë për të forcuar kapacitetet e saj mbrojtëse pasi në vitin 2022 vlerësoi se kishte vetëm 60 për qind të raketave interceptuese që i nevojiteshin për mbrojtjen kombëtare.
Marina amerikane e pezulloi programin e saj për topin elektromagnetik në vitin 2021 pas një dekade zhvillimi që kushtoi më shumë se 500 milionë dollarë, për shkak të sfidave të mëdha me fuqinë dhe mbinxehjen.
Por Kina e ka zhvilluar topin e saj elektromagnetik për vite me radhë në fshehtësi të madhe.
Në vitin 2018, fotografi të publikuara tregonin anijen luftarake kineze Haiyang Shan, një mjet zbarkimi, të pajisur me një prototip të një top elektromagnetik.
India, Rusia dhe Turqia gjithashtu kanë testuar prototipa të ngjashëm. Ndonëse Mbretëria e Bashkuar ka bërë kërkime, ajo nuk po rindërton top elektromagnetik të sajën.
Në vend të kësaj, ajo është në faza të avancuara të zhvillimit të një arme me energji direkte të quajtur DragonFire.
E vlerësuar si një armë revolucionare, DragonFire përdor lazer për të rrëzuar dronë dhe raketa përmes një rreze të fuqishme drite, jo me predha të lëshuara nga forcat elektromagnetike, dhe ka një kosto prej vetëm 10 sterlina për të shtënë.
Ukraina ka zhvilluar armën e saj me lazer, e cila besohet të jetë modeluar sipas një prototipi britanik, pasi dizajnet iu ndanë Kievit në vitin 2024.
