Sophie Naiwaide, e njohur për rolin e saj në filmin dramatik “Mammoth” (2009), ndërroi jetë në moshën 24-vjeçare. Familja e saj njoftoi se shkaku i saktë i vdekjes nuk është i qartë, por theksoi vështirësitë psikologjike që Sophie kishte përjetuar.
Në deklaratën e tyre, ata përshkruajnë një vajzë të ndjeshme dhe të talentuar, që shpesh gjente strehë në art dhe aktrim.
“Ajo shkruante dhe vizatonte pa pushim”, thuhet në deklaratë. “Shumë nga veprat e saj ishin pasqyra e dhimbjes dhe traumave të saj personale.”
Familja tregoi gjithashtu se Sophie shpesh refuzonte ndihmën profesionale dhe përpiqej të përballonte gjithçka vetë.
“Vazhdonte të thoshte se do ta ‘menaxhonte’ vetë situatën”, shkruajnë ata me dhimbje. “Ajo dukej më e lumtur në një set filmi, duke u bërë dikush tjetër — ishte vendi i saj i sigurt.”
E lindur më 8 korrik 2000 në Burlington, Vermont, Sophie u rrit në një kinema të vogël që e ëma kishte blerë. Pas shikimit të filmit Something’s Gotta Give në moshën 4-vjeçare, ajo shprehu dëshirën për t’u bërë aktore. Roli i saj i parë erdhi në filmin Bella (2006), i ndjekur nga paraqitje në Law & Order, Margot at the Wedding (2007), Shadows & Lies (2010) me James Franco, Noah (2014) me Russell Crowe dhe An Invisible Sign (2010) me Jessica Alba.
Ajo mori vlerësime për talentin e saj, përfshirë një rishikim pozitiv nga kritika Janet Katsolis në The New York Times, e cila shkroi se Sophie “duhet të ketë një të ardhme të ndritur përpara”.
Vdekja e saj ka lënë një boshllëk të madh tek të afërmit dhe bashkëpunëtorët e saj, që e kujtojnë si një shpirt të bukur, plot pasion, mirësi dhe thellësi të jashtëzakonshme.
