Disa banorë të një pallati në zonën e Freskut, pranë shkollës “Klodian Tanushi”, ankohen në emisionin “Stop” në Tv Klan se aty do të bëhet një rrugë për të cilën nuk ka asnjë tabelë me të dhënat e projektit.
Nga shenjat e vëna duket se aty nuk do të lihet asnjë hapësirë për trotuar, prandaj banorët janë të shqetësuar që nuk do të kenë kalim as për ambulancë e zjarrfikëse.
“Stop” bën matjet sipas shenjave të vendosura dhe rezulton se trotuari sipas shenjave, do të jetë 86 centimetra.
Administratori i njësisë shprehet se këtë rrugë po e bën Autoriteti Rrugor Shqiptar. Nga ARRSH-ja banorët nuk morën asnjë përgjigje, edhe pse kanë bërë shkresë për informacion.
Qytetari: Kemi bërë ankesë të mos prishet trotuari i pallatit tonë. Të mos prishet ambienti ynë! Dhe e dyta, firma që ka marrë përsipër të bëjë punimet, s’ka asnjë tabelë orientimi. Nuk ka asnjë projekt që është i bashkisë, asnjë autorizim nga bashkia apo Autoriteti Rrugor që thotë ma ka dhënë bashkia.
Punonjësja: Specialistët për momentin nuk janë këtu. Duhet të vijnë inxhinierët të cilët i përkasin sektorit ku është bërë kërkesa. Duhet të prisni edhe këtë javë! Mund të kaloni edhe ditë tjetër, ndoshta janë specialistët këtu! Kërkesa do të shqyrtohet dhe do t’ju kthehet përgjigje.
Qytetari: Mirë do të ishte ta takonim qoftë një, thjesht a ka një projekt, ta dimë edhe ne! Po, jo, kaq të na thotë!
Punonjësja: E kuptoj, por nuk janë sektori që ka kërkesën për shqyrtim./tvklan
