Sali Berisha, gjatë një takimi me fermerët e Elbasanit në kuadër të fushatës për zgjedhjet e 11 Majit, ka komentuar edhe skandalin me tonelata mish pule me salmonelë të importuara në vendin tonë nga Brazili.
Berisha hodhi akuza se biznesmeni Mondi Goxha, pronari i dy kompanive “AMG” dhe “diMal” të cilat importuan dhe shpërndanë në treg mishin e infektuar të pulës, është eksponent i Partisë Socialiste.
“Para një muaji u shitën tonelata mish pule me salmonelë. Po. Dhe ishte eksponent socialist ai që i solli. Por, që duket se i kishte çuar edhe Edi Ramës në shtëpi të atilla dhe e kapi salmonela. E kapi salmonela dhe mjekëve u thoshte e kam nga breshka. Po ekzakt, se mban breshka në shtëpi ai për arsye të tjera. I mban për arsye shëndetësore. Tani imagjinoni se çfarë sigurie, kur salmonela shkon tek kryeministri, siguria është zero.” tha Berisha.
