Është shtyrë sërish seanca gjyqësore në Gjykatën e Posaçme ndaj të pandehurëve për dosjen e aferës së sterilizimit, ku shkak u bë mungesa e avokatit të ish-ministrit të Shëndetësisë, Ilir Beqaj.
Vetë ish-ministri, ndryshe nga hera e kaluar, kishte ardhur në seancë, por jo avokati i tij, i cili përmes postës elektronike i ka kërkuar gjykatës shtyrje të procesit. Avokati Ermal Yzeiraj njoftonte GJKKO-në se ishte në një proces tjetër gjyqësor dhe e kishte të pamundur të ishte i pranishëm në gjyqin e sterilizimit.
Ilir Beqaj tha se do përpiqet të gjejë edhe një avokat të dytë që gjykimi të mos shtyhet më në vazhdim. Gjykata vendosi të ndëshkojë me gjobë prej 30 mijë lekësh për mungesën e tij avokatin e ish-ministrit dhe caktoi edhe një avokat kryesisht për të. Seanca u shty për në datën 30 Prill në orën 13:00.
Ilir Beqaj është marrë i pandehur nga SPAK për veprën penale vjedhje duke shpërdoruar detyrën në kuadër të grupit të strukturuar kriminal. Gjykimi ndaj Ilir Beqajt po vazhdon me procedura të zakonshme, pasi nuk pranoi gjykimin e shkurtuar, duke pretenduar se do të rrëzojë akuzën e ngritur nga GJKKO.
Të pandehur për aferën e sterilizimit janë marrë edhe ish-zv.ministri Klodian Rjepaj, biznesmenit Ilir Rrapaj dhe anëtarët e Komisionit të Vlerësimit të Ofertave: Marsela Serjani, Saimir Kadiu, Petref Mersini, Arben Gjata, Genc Burazeri dhe Naile Ajazi (Abazi).
Hetimet gati 3-vjeçare të kryera nga SPAK kanë zbuluar shkelje të ligjit në procedurat e dhënies së njërit prej koncesioneve më të kushtueshme të sektorit të shëndetësisë, me qëllimin e vetëm të shpalljes fitues të kompanisë së Ilir Rrapajt dhe shtetasit Italian, Umbro Staccini. Referuar hetimeve, vlera e koncesionit që llogaritet rreth 100 milionë euro, është fryrë fiktivisht dhe dhjetëra milionë euro. Para që deri më tani, prokuroria nuk e ka zbuluar se në xhepat e kujt kanë shkuar.
Në lidhje me këtë dosje, SPAK lëshoi urdhër-arreste vetëm Klodjan Rrjepajn dhe Ilir Rrapajn në Gushtin e vitit të kaluar, por Ilir Beqaj u arrestua më vonë. Ai u vu në pranga në fillim të muajit korrik në lidhje me abuzimin me fondet e Bashkimit Europian gjatë kohës që ish-ministri drejtonte Agjencinë Shtetërore të Programimit Strategjik dhe Koordinimit të Ndihmës (SASPAC).
