Policia e Tiranës ka arrestuar një shtetas kosovar, i cili zhvaste qytetarët nëpërmjet mashtrimit, duke iu kërkuar 1000-1500 euro për kontrata pune në shtete të ndryshme.
Operacioni është ekzekutuar pas 3 muajsh hetimesh nga Prokuroia e Tiranës mbi kallëzimet e disa qytetarëve. Në kuadër të operacionit të koduar “Premtimi” është vënë në pranga shtetasi Hamz Bytyçi, 41 vjeç, banues në Kosovë.
Policias thotë se ka dokumentuar tre raste të marrjes së shumave të parave me anë të mashtrimit, gjatë muajit prill, nga 41-vjeçari.
“Nga hetimet ka rezultuar se 41-vjeçari premtonte kontrata pune në shtete të ndryshme, kundrejt pagesës që varionte nga 1000 deri në 1500 euro, nëpërmjet mashtrimit. Gjatë muajit prill 2025, ky shtetas, nëpërmjet kësaj mënyre mashtrimi, iu ka marrë para, 3 shtetasve.
Vijojnë hetimet për dokumentimin e rasteve të tjera të mashtrimit nga ky shtetas dhe për identifikimin e shtetasve me të cilët ai mund të ketë bashkëpunuar.” – njoftojnë blutë e kryeqytetit.
Materialet procedurale i janë referuan Prokurorisë së Tiranës, për veprime të mëtejshme.
