Emisioni “Stop” ndodhet në Tiranë me zonjën Lindita Reci, e cila tregon se si ajo bashkë me 10 trashëgimtarë të tjerë, u përjashtuan nga 3 tezet dhe daja nga përfitimi i trashëgimisë nga stërgjyshi. Lindita thotë se kanë kaluar 3 shkallët e gjyqësorit dhe kanë siguruar të drejtën të marrin 27 njësi, apartamente, garazhe dhe dyqane.
Edhe pse i kanë marrë certifikatat e pronësisë, tezet Nexhmie Shaba, Marjana Vorbsi, Lejla Rakipllari dhe daja, Xhevdet Shaba, nuk i lirojnë apartamentet, që kanë 20 vjet, që i shfrytëzojnë.
“Mami im ka marrë një tokë nga gjyshi i vet që quhet Rexhep Shaba. Morëm pronën 9 dynymë e 200 metra katrorë. Pasi morëm pronën filluan tezet e mia dhe daja ndërtim në tokë dhe ne na lanë në pjesën tjetër që binte rrugë, lulishte. Na përjashtuan dhe ne filluam direkte hapëm gjyq, filloi shkoi Shkalla e Parë që unë e kam marrë, na hodhën në Gjykatën e Apelit që edhe atë unë e kam marrë. Në Gjykatë të Lartë unë e kam të fituar në vitin 2023, që ka marrë fund. Më pas bëmë kontratën e shkëmbimit dhe firmën e ndërtimit, nuk hasëm asnjë pengesë dhe ajo ishte e gatshme. Mora certifikatat e pronës, shkova të merrja hyrjen time dhe nuk më lejuan. Më thanë ti je pronare, por nuk hyn dot se jam unë. Janë 27 njësi, janë 17 apartamente janë 2 dyqane dhe 6 garazhe. Ngrenë dhe hapin një padi dhe gjykata e ka rrëzuar padinë e tyre”, thotë denoncuesja.
“Stop” shkoi në Yzberish, aty ku është ndërtuar pallati dhe trashëgimtarët treguan se çfarë lufte kanë bërë për të hyrë në dy prej tyre. “Stop” kërkoi edhe qëndrimin e palës tjetër në konflikt, por ata nuk deshën të shpjegohen.
Gazetarja: Si kaluat? A është lokali i Nexhmie Shabës ky këtu?
Bashkëjetuesi: Po! Kush je ti?
Gazetarja: Zonja Nexhmie ju jeni?
Nexhmie Shaba: Po!
Gazetarja: Unë jam Domenika, gazetare e emisionit Stop. Mund të flas pak?
Nexhmie Shaba: Jo nuk mund të flasësh!
Gazetarja: Nuk doni të flisni?
Nexhmie Shaba: Jo!
Gazetarja: Nuk të thërras nga Klani, unë erdha të të pyes, nëse do flasësh apo jo?
Nexhmie Shaba: Jo, jo!
Gazetarja: S’do të flasësh, mirupafshim!
Nexhmije Shaba, e pajisur me prokurë nga motrat e tjera, i është drejtuar gjykatës me pretendimin për dhunë në familje nga nipërit e mbesat. Ndërkohë, këta të fundit kanë kërkuar vetëm, që të marrin apartamentet që kanë në pronësi.
Sikur të mos mjaftonte kjo, Nexhmija është pajisur me urdhër mbrojtjeje për 12 muaj. Denoncuesit praktikisht kanë shpenzuar 20 vjet, për të marrë këto apartamente, por trashëgimtarët duhet të shkojnë sërish në gjykatë, për të kërkuar këtë radhë lirim dorëzim sendi që të futen në shtëpitë e tyre./tvklan
