Interi rikthehet në fushë për të mbrojtur avantazhin 2-1, të arritur në ndeshjen e parë ndaj Bayern Munich.
Simone Inzaghi foli në konferencë për shtyp nga “Appiano Gentile”, përpara ndeshjes së kthimit çerekfinale të Champions League, që do të luhet nesër prej orës 21:00 në “San Siro”.
“Unë do të thosha që më shumë se tension, ka krenari të madhe për mënyrën se si po zhvillohet ky sezon nga Interi. E dimë që nesër do të jetë shumë e vështirë, duhet ta harrojmë rezultatin e ndeshjes së parë, por jo paraqitjen që bëmë në Mynih.
Bëmë një ndeshje të shkëlqyer atje, por e njohim vlerën shumë të lartë të kundërshtarit. Do të duhet të bëjmë një ndeshje të madhe kthimi, me vrapim, agresivitet dhe qëndrim të duhur. Është një çerekfinale, pjesa e parë u luajt në Mynih dhe nesër është pjesa e dytë”, deklaroi trajneri i Interit.
