Policia e Tiranës ka arrestuar një person, i cili akuzohet se ka kërcënuar me armë zjarri pistoletë një grua, teksa në banesë mbante dhe armë gjahu, armë të ftohtë dhe municion luftarak
Në kuadër të operacionit të koduar “Prevention” është vënë në pranga shtetasi Ledian Lato, 37 vjeç, banues në Tiranë.
Sipas bluve të kryeqytetit, nga hetimet dyshohet se 37-vjeçari ka kanosur me armë zjarri pistoletë, një 40-vjeçare në rrugën “Muhamed Deliu” në zonën e Freskut, për motive të dobëta.
Ndërkohë, gjatë kontrollit në banesën e 37-vjeçarit, uniformat blu kanë gjetur armën e zjarrit pistoletë që dyshohet se e ka përdorur për kanosjen, dy armë gjahu, një armë të ftohtë dhe municion luftarak.
Materialet procedurale i kaluan Prokurorisë së Tiranës për veprime të mëtejshme.
