Vetëm tre ditë pas nisjes zyrtare të fushatës elektorale për zgjedhjet parlamentare të 11 Majit, është arrestuar dhe personi i parë i akuzuar për krim zgjedhor.
Më konkretisht, në Lushnjë është arrestuar nga Policia shtetasi Marin Leka, 38 vjeç, i cili akuzohet për veprat penale “Korrupsioni aktiv në zgjedhje” dhe “Marrja dhe përdorimi i paligjshëm i dokumentit të identifikimit”.
Sipas autoriteteve policore, 38-vjeçari i ka premtuar para një shtetasi në këmbim të votës për zgjedhjet e 11 Majit.
“Nga hetimet e kryera në bashkëpunim me Prokurorinë e Fierit, dyshohet se shtetasi M. L. i ka marrë një shtetasi, kartën e identitetit, si dhe i ka premtuar dhënien e një shume parash, dyshohet me qëllim blerjen e votës në favor të një subjekti politik, pjesëmarrës në zgjedhjet parlamentare të datës 11.05.2025.” – thuhet në njoftimin e Policisë.
Materialet procedurale i kanë kaluar Prokurorisë së Posaçme për veprime të mëtejshme.
